सचिन वाझे प्रकरण : मुख्यमंत्री ठाकरेंनी आज सह्याद्रीवर बोलावली मंत्र्यांची बैठक

राज्यात सध्या चर्चेत असलेल्या पोलीस अधिकारी सचिन वाझे प्रकरणाच्या पार्श्वभूमीवर मुख्यमंत्री उद्धव ठाकरे यांनी सह्याद्री अतिथीगृहावर महाविकास आघाडीच्या मंत्र्यांची बैठक बोलावली आहे. या प्रकरणात सरकारची प्रतिमा मलीन झाली आहे. त्या संदर्भात आज या बैठकीत चर्चा होण्याची शक्यता आहे.

मुंबई- राज्यात सध्या चर्चेत असलेल्या पोलीस अधिकारी सचिन वाझे प्रकरणाच्या पार्श्वभूमीवर मुख्यमंत्री उद्धव ठाकरे यांनी सह्याद्री अतिथीगृहावर महाविकास आघाडी सरकारमधील नेत्यांची बैठक बोलावली आहे. बैठकीत पोलीस दलातील खांदेपालटाबाबत चर्चा होणार आहे. दरम्यान, गृहमंत्री अनिल देशमुख, पोलीस महासंचालक हेमंत नगराळे, मुंबई पोलीस आयुक्त परमबीर सिंग यांचीही वाझे प्रकरणावर मंगळवारी रात्री उशिरा १२ वाजेपर्यंत बंद दाराआड चर्चा झाली. त्यानंतर आज सकाळी या प्रकरणाशीसंबंधित आणखी बैठक होणार असल्याने याकडे सर्वांचे लक्ष लागले आहे.

सह्याद्रीवर बोलावली मंत्र्यांची बैठक

अंबानींच्या घराबाहेर आढळलेल्या स्फोटकांप्रकरणात मुंबई पोलीस दलातील अधिकारी सचिन वाझे यांना एनआयएने अटक केली आहे. या प्रकरणात पोलिसांकडून अनेक गंभीर चुका केल्याचे एनआयएच्या चौकशीतून पुढे येत आहे. त्यामुळे मुंबई पोलीस आयुक्तांवर याचे खापर फुटण्याची शक्यता वर्तवली जात आहे. या पार्श्वभूमीवर मुंबईतील वर्षा बंगल्यावर मुख्यमंत्र्यांची महत्वाच्या मंत्री आणि नेत्यांसोबतच्या गेले दोन दिवस बैठकांचा जोर सुरू आहे. शरद पवार यांनी देखील मुख्यमंत्री उद्धव ठाकरे यांच्यासोबत मंगळवारी रात्री फोनवरून चर्चा केली. त्यामुळे आज मोठ्या घडामोडी होण्याची शक्यता वर्तवली जात आहे.बैठकीला हे उपस्थित असणारउपमुख्यमंत्री अजित पवार, गृहमंत्री अनिल देशमुख, नगरविकासमंत्री एकनाथ शिंदे, परिवहन मंत्री अनिल परब, राष्ट्रवादीचे प्रदेशाध्यक्ष जयंत पाटील, काँग्रेस नेते आणि महसूलमंत्री बाळासाहेब थोरात उपस्थित असणार आहेत.