पंतप्रधान, मुख्यमंत्री यांची नक्कल केल्याने गुन्हा दाखल; सरकारकडून सूडबुद्धीने कारवाई होत असल्याचा विरोधकांचा आरोप

राज्यात महाविकास आघाडी सरकार असताना भारतीय जनता पक्षाच्या नेत्यांवर कारवाई झाली होती. त्यावेळेस सूडबुद्धीने कारवाई केल्याचा आरोप राज्य सरकारवर ठेवण्यात आला होता. तर, आता राज्यात सत्तातर झाल्यानंतर शिवसेना उद्धव बाळासाहेब ठाकरे या पक्षाच्या नेत्यांवर गुन्हे दाखल झाले आहेत. त्यामुळे राज्य सरकार सूडबुद्धीने नेत्यांवर गुन्हे दाखल करत असल्याचा आरोप होत आहे.

मुंबई - ठाण्यातील महाप्रबोधन यात्रेत शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे, नेते भास्कर जाधव, उपनेत्या अनिता बिर्जे आणि खासदार विनायक राऊत यांच्यावर गुन्हे दाखल करण्यात आले आहेत. मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि देशाचे पंतप्रधान नरेंद्र मोदी यांची भाषणामध्ये नक्कल केल्यामुळे ठाण्यात या तिन्ही नेत्यांवर गुन्हा दाखल झाला आहे. कलम 153, 500 अंतर्गत गुन्हा दाखल करण्यात आला आहे. ठाण्याच्या गडकरी रंगायतन या नाट्यगृहात महाप्रबोधन यात्रेचा जाहीर मेळावा झाला. या मेळाव्यामध्ये प्रक्षोभक आणि चिथावणीखोर वक्तव्य करून मुख्यमंत्री एकनाथ शिंदे यांची प्रतिमा मालिन केल्याचा शिंदे गटाने ठाकरे गटातील नेतेमंडळींवर केला आहे. राजकीय सुडपोटी कारवाईचा आरोप एकनाथ शिंदे यांच्या बाळासाहेबांची शिवसेना आणि राज्य सरकारच्या विरोधात शिवसेना उद्धव बाळासाहेब ठाकरे यांनी आता रान उठवायला सुरुवात केली आहे.

ठाण्यातून जनप्रबोधन यात्रा सुरू करण्यात आले असून गडकरी रंगायत्यांमध्ये झालेल्या भाषणादरम्यान नेत्यांनी कोणतेही आक्षेपार्य भाष्य केलेले नाही. तसेच, इतर कोणत्याही नेत्यांची टिंगल टवाळी करण्यात आलेली नाही. मात्र, सध्या राज्य सरकारकडून सत्तेचा गैरवापर सुरू आहे. पोलिसांवर दबाव टाकून अशा प्रकारची गुन्हे नेत्यांवर दाखल करण्यात आला असल्याचा आरोप शिवसेना उद्धव बाळासाहेब ठाकरे पक्षाच्या उपनेता संजना घाडी यांनी केला आहे. तसेच आपल्या विरोधात जे बोलतील त्यांच्यावर दंड शाही केली जाईल हे सांगण्याचा प्रयत्न सरकार करत आहे असा आरोपही उपनेता सुषमा अंधारे यांनी ही केला आहे.

जैसी करणी, वैसी भरणी - ठाण्यातील महाप्रबोधन यात्रेत शिवसेना उद्धव बाळासाहेब ठाकरे पक्षाच्या नेत्यांनी पंतप्रधान, मुख्यमंत्री, उपमुख्यमंत्री यांच्यावर टिंगल टवाळी केली. केंद्रीय मंत्री नारायण राणे यांनी मुख्यमंत्री असताना उद्धव ठाकरे यांच्याबद्दल वापरलेल्या अपशब्दामुळे त्यांना अटक करण्यात आली होती. थेट त्यांना जेवणाच्या ताटावरून पोलिसांनी नेले होते. त्यांच्या विरोधातही गुन्हा दाखल करण्यात आला होता त्यावेळी व्यक्ती स्वातंत्र्य कुठे गेले होते? अशा पद्धतीने लोकांना अटक करण्याचा पायंडा तात्कालीन सरकारनेच पाडला आहे. ही दिशा विरोधकांनीच दाखवलेली आहे. त्यामुळे आता आरडाओरड करण्याची कोणतीही गरज नाही, असा टोला बाळासाहेबांची शिवसेना पक्षाचे प्रवक्ते नरेश मस्के यांनी शिवसेना उद्धव बाळासाहेब ठाकरे पक्षाला लगावला आहे.

मआवि सरकारच्या काळात कोणत्या नेत्यांवर कोणते गुन्हे - राणे पिता पुत्रवर झाला होता गुन्हा दखल - दिशा सालियन मृत्यू प्रकरणी आक्षेपार्ह व बदनामीकारक विधाने केल्याबद्दल मालवणी पोलीस ठाण्यात नारायण राणे आणि नितेश यांच्याविरुद्ध गुन्हा दाखल करण्यात आला होता. त्यानंतर या दोघांना जबाब नोंदवण्यासाठी पोलीस ठाण्यात हजर राहण्याचे समन्सही बजावण्यात आले होते. मात्र, नारायण राणे यांनी पोलीस ठाण्यात हजर राहण्यासाठी वेळ वाढवून मागितली होती. त्यांनी पोलिसांना पत्र पाठवून तशी विनंतीही केली होती. यानंतर राणे पितापुत्रांनी दिंडोशी सत्र न्यायालयात अटकपूर्व जामिनासाठी अर्जही केला होता. तसेच, केंद्रीय मंत्री नारायण राणे यांनी तत्कालीन मुख्यमंत्री उद्धव ठाकरे यांच्याबाबत आक्षेपार्ह विधान केल्यामुळे त्यांना अटक करण्यात आली होती.

मुंबई बँकेत दरेकरांच्या निवडीवर होते प्रश्नचिन्ह - प्रवीण दरेकर यांची मुंबै बँकेवर संचालक म्हणून बिनविरोध निवड झाली होती. मुंबै बँकेच्या निवडणुकीत प्रवीण दरेकर मजूर आणि नागरी सहकार बँक अशा दोन्ही प्रवर्गातून निवडून आले होते. परंतु, सहकार विभागाने प्रवीण दरेकर यांना मजूर म्हणून अपात्र ठरवलं. दरेकर 1997 पासून मुंबै बँकेवर मजूर प्रवर्गातून संचालक म्हणून निवडून येत आहेत. पण मजूर नसतानाही निवडणूक लढवून प्रवीण दरेकर यांनी बँकेच्या हजारो ठेवीदारांची आणि सरकारची फसवणूक केल्याचा आरोप करत आम आदमी पक्षाचे धनंजय शिंदे यांनी त्यांच्याविरोधात तक्रार नोंदवली. मुंबै बँकेत कोट्यवधीचा घोटाळा झाला असून सहकार कायद्याचं उल्लंघन केल्याचा आरोप दरेकर यांच्यावर होता. याबाबत प्रवीण दरेकर यांनी कायदेशीर लढा दिला.

राणा दाम्पत्याला झाली होती अटक - खासदार नवनीत राणा आणि आमदार रवी राणा या दोन्ही नेत्यांनी तात्कालीन मुख्यमंत्री उद्धव ठाकरे यांच्या विरोधात मोर्चा उघडला होता. उद्धव ठाकरे यांच्या खाजगी निवासस्थान मातोश्री परिसरात जाऊन हनुमान चालीसा वाचण्याचा प्रयत्न या दोन्ही नेत्यांनी केला होता. या विरोधात या दोन्ही नेत्यांवर गुन्हा दाखल झाला. दोन्ही नेत्यांना अटक ही झाली होती. जवळपास दोन आठवडे या दोन्ही नेत्यांना तुरुंगात राहावे लागले होते असही ते म्हणाले आहेत.