म्हाडा वसाहतींना मुंबई महानगरपालिका पुरविणार मूलभूत सुविधा

सर्व सुविधा यापुढे मुंबई महानगरपालिकेतर्फे पुरविण्यात येतील, अशी माहिती मुंबई इमारत दुरुस्ती व पुनर्रचना मंडळाचे सभापती विनोद घोसाळकर यांनी दिली आहे.

मुंबई -मुंबईत म्हाडा (MHADA)च्या अनेक वस्ती आहेत. या वसाहतींमध्ये मलनिःसारण वाहिन्या, जलवाहिन्या जोडणी, रस्त्यांची दुरुस्ती आदींसाठी नागरिकांना पाठपुरावा कुठे करायचा, हा प्रश्न होता. मात्र आता यावर तोडगा काढण्यात आला आहे. यासर्व सुविधा यापुढे मुंबई महानगरपालिके(BMC)तर्फे पुरविण्यात येतील, अशी माहिती मुंबई इमारत दुरुस्ती व पुनर्रचना मंडळाचे सभापती विनोद घोसाळकर यांनी दिली आहे.

सुविधा पुरविण्याचा उद्देश

म्हाडा मुख्यालयात आमदार, खासदार, म्हाडा आणि महापालिकेचे अधिकारी यांची मंगळवारी बैठक झाली. या बैठकीत हा निर्णय घेण्यात आला. म्हाडा मुख्यालयात शहरातील म्हाडा वसाहतींमध्ये सुविधा पुरविण्याच्या उद्देशाने म्हाडा व महापालिकेचे अधिकारी यांची सकाळी बैठक झाली. या बैठकीला महापौर किशोरी पेडणेकर (Kishori Pednekar), खासदार अरविंद सावंत (Arvind Sawant), खासदार गजानन कीर्तिकर (Gajanan Kirtikar), म्हाडाच्या मुंबई मंडळाचे मुख्य अधिकारी योगेश म्हसे, मुंबई इमारत व दुरुस्ती मंडळाचे मुख्य अधिकारी अरुण डोंगरे आदी उपस्थित होते.

मूलभूत सुविधा महापालिकेमार्फतच

राज्य सरकारने म्हाडाला स्वतंत्र नियोजन प्राधिकरणाचा दर्जा दिल्यानंतर मुंबई शहर व उपनगरातील म्हाडा वसाहतींमध्ये महापालिकेतर्फे मलनिःसारण वाहिन्या, जयवाहिन्या जोडणी, रस्त्यांची दुरुस्ती इत्यादींसारख्या मूलभूत सुविधा देण्यास नकार दिला होता. नागरिकांची होत असलेली गैरसोय लक्षात घेता बैठकीत मुंबई शहर व उपनगरातील म्हाडा वसाहतींमध्ये मलनिःसारण वाहिन्या, जलवाहिन्या, रस्ते दुरुस्ती आदी मूलभूत सुविधा महापालिकेमार्फतच पुरविल्या जातील, असा निर्णय घेण्यात आला. तसेच महापालिका व म्हाडा या दोन्ही संस्थांमधील थकबाकीचा प्रश्न सोडविण्यासाठी उच्चस्तरीय समिती स्थापन करण्याचा निर्णयही या बैठकीत घेण्यात आला.

दर तीन महिन्यांनी बैठक

पाण्याचे बिल न भरल्यामुळे अनेक ठिकाणचा पाणीपुरवठा खंडित करण्यात आला आहे. मध्यम मार्ग काढून पाणीपुरवठा पूर्ववत करण्याबाबत चर्चा झाली. म्हाडा आणि महापालिकेचे आणि लोकप्रतिनिधींचे प्रश्न मार्गी लावण्यासाठी दर तीन महिन्यांनी बैठक आयोजित करण्यात येईल, असे घोसाळकर म्हणाले.