बॉलिवूड ड्रग्स प्रकरण : करण सजनानी व मुच्छड पानवाला असे करायचे अमली पदार्थांची तस्करी

नार्कोटिक्स कंट्रोल ब्युरोकडून बॉलीवूड ड्रग्स सिंडिकेट प्रकरणी सर्व आरोपींच्या चौकशीनंतर मुंबईतल्या सुप्रसिद्ध मुच्छड पानवाला म्हणून ओळखल्या जाणाऱ्या राम कुमार तिवारी या आरोपीला अमली पदार्थ तस्करी प्रकरणी अटक करण्यात आलेली आहे.

मुंबई- नार्कोटिक्स कंट्रोल ब्युरोकडून बॉलीवूड ड्रग्स सिंडिकेट प्रकरणी तपास करत असताना यामध्ये आतापर्यंत अनेक अमली पदार्थ तस्करांना अटक करण्यात आली आहे. या प्रकरणात बॉलीवूड चित्रपट सृष्टीतील काही नामवंत कलाकारांची सुद्धा चौकशी करण्यात आलेली आहे. काही दिवसांपूर्वी ब्रिटिश अनिवासी भारतीय असलेल्या करण सजनानी या आरोपीला अटक करण्यात आल्यानंतर अभिनेत्री दिया मिर्झाची माजी मॅनेजर म्हणून काम पाहणाऱ्या राहिला फर्निचरवालासह आणखीन एका महिला आरोपीला अटक करण्यात आली होती. या सर्व आरोपींच्या चौकशीनंतर मुंबईतल्या सुप्रसिद्ध मुच्छड पानवाला म्हणून ओळखल्या जाणाऱ्या राम कुमार तिवारी या आरोपीला अमली पदार्थ तस्करी प्रकरणी अटक करण्यात आलेली आहे. अटक करण्यात आलेल्या मुच्छड पानवाला उर्फ राम कुमार तिवारी यास न्यायालयाने 14 दिवसांच्या न्यायालयीन कोठडीत पाठविण्यात आल्यानंतर यासंदर्भात एनसीबीकडून अधिक तपास करत आहे.

अमेरिकेतून गांजा मागवून क्रेडिट-डेबिट कार्डमधून पेमेंट -ब्रिटिश अनिवासी भारतीय करण सजनानी याला एनसीबीने अटक करून त्याची चौकशी केली असता करण सजनानी हा अमेरिकेतून मोठ्या प्रमाणात अमली पदार्थ मागवत होता आणि मागवलेल्या अमली पदार्थांचे पेमेंट क्रेडिट किंवा डेबिट कार्डच्या माध्यमातून करत असल्याचे तपासात समोर आलेले आहे. क्रेडिट-डेबिट कार्डमधून पेमेंट करत असताना त्याची मदत त्याची जवळची मैत्रीण राहिला फर्निचरवाला ही करत असल्याचे अधिकाऱ्यांचे म्हणणे आहे.करन सजनानी हा राम कुमारच्या जवळच्या संपर्कातील -राम कुमार तिवारी याच्या जवळच्या संपर्कात करण सजनानी असल्याचं लक्षात आल्यानंतर करण सजनानी याने एनसीबीला सांगितलं की त्याने रामकुमार तिवारीला काही वेळा भेटून त्याच्याकडे पाकीट दिलेलं होत. त्या पाकिटात अमली पदार्थ असल्याचे करण सजनानी सांगत आहे. मात्र, रामकुमार तिवारीला दिलेल्या अमली पदार्थांच्या पाकिटाबद्दल कुठलाही मोबदला घेतला नसल्याचे सजनानी म्हणतोय. राम कुमार तिवारी याचं बॉलिवूड सेलिब्रेटींसोबत चांगली ओळख असल्यामुळे सदर अमली पदार्थ विकले जाईल, अशा प्रकारची तजवीज करण्याचं काम रामकुमार तिवारीला दिले होतं असं एनसीबी अधिकाऱ्यांचे म्हणणे आहे.मुच्छड पानवाल्याचा व्यवसाय घटला -दरम्यान, मुच्छड पानवाला म्हणून सुप्रसिद्ध असलेल्या दुकानात दरदिवशी 500 ते 600 पानांची विक्री केली जात होती. मात्र राम कुमार तिवारी याला अटक केल्यानंतर या व्यवसायात 30 टक्क्यांची घट आल्याचाही मुच्छड पानवाला येथे काम करणाऱ्या कामगारांचे म्हणणे आहे. दरम्यान राहिला फर्निचरवाला करण सजनानी या दोघांच्या एनसीबी कोठडीत 14 जानेवारीपर्यंत वाढ करण्यात आलेली आहे.