बेकायदा पार्किंगवर पालिकेची कारवाई; महिनाभरात ६७ लाखांचा दंड वसूल

महापालिकेने उपलब्ध करून दिलेल्या वाहनतळावर गाडी पार्किंग न करता रस्त्यात पार्किंग केल्याने मोठ्या प्रमाणात वाहतूक कोंडी होत होती. या बेकायदा पार्किंगला आळा बसावा म्हणून महापालिकेने दंडात्मक कारवाई सुरू केली आहे.

मुंबई -शहरातील वाहतूक सुरळीत व्हावी तसेच बेकायदा पार्किंगला आळा बसावा म्हणून महापालिकेने दंडात्मक कारवाई सुरू केली आहे. दरम्यान, गेल्या महिनाभरात १०४१ वाहनांवर कारवाई करत महापालिकेने तब्बल ६७ लाख ६५ हजार ५६५ रुपये दंड वसूल केल्याची माहिती पालिका अधिकाऱ्याने दिली.

महापालिकेने उपलब्ध करून दिलेल्या वाहनतळावर गाडी पार्किंग न करता रस्त्यात पार्किंग केल्याने मोठ्या प्रमाणात वाहतूक कोंडी होत होती. यामुळे महापालिका प्रशासनाने बेकायदा पार्किंगला आळा घालण्यासाठी दंडात्मक कारवाई सुरू केली. वाहन तळालगतच्या ५०० मीटर परिसरात बेकायदा पार्किंग केल्यास वाहनचालकाकडून दंड वसूल करण्याचा निर्णय महापालिका प्रशासनाने घेतला आहे. या निर्णयाची अंमलबजावणी ७ जुलैपासून करण्यात येत आहे.

बेकायदा पार्किंगवर महापालिकेची कारवाई

अवजड वाहन बेकायदा पार्किंग केल्यास दहा हजार व ५ हजार टोचन असे एकूण १५ हजार रुपये वसूल करण्यात येत आहेत. तर चारचाकी वाहनासाठी टोचनसह १० हजार रुपये आणि दुचाकीसाठी ५ हजार रुपये दंड आकारण्यात येत आहे. मुंबईत १४६ वाहनतळांची जागा राखीव असून त्यावर ३४ हजार ८०८ वाहने उभी करण्याची सुविधा आहे. मात्र, सध्या पालिकेच्या ताब्यात असलेल्या २६ वाहनतळांच्या परिसरात दंडात्मक कारवाई करण्यात येत आहे. महिनाभरात ६८४ चारचाकी, २४ तीनचाकी, ३३३ दुचाकी अशा एकूण १०४१ वाहनांवर महापालिकेने कारवाई केली असून ६७ लाख ६५ हजार ५६५ रुपये दंड वसूल करण्यात आला आहे. पालिकेच्या एकूण सात परिमंडळांपैकी परिमंडळ क्र. २ मध्ये सर्वात जास्त ९ लाख २७ हजार ५५ रुपये दंड वसुली करण्यात आली, तर परिमंडळ क्र. ५ मध्ये सर्वात कमी ३० हजार ११० रुपये दंडवसुली करण्यात आल्याची माहिती महापालिका अधिकाऱ्याने दिली.