मुंबई - भाजप आणि मनसेची युती महानगरपालिका निवडणुकीच्या पार्श्वभूमीवर होईल अशी चर्चा राजकीय वर्तुळात सुरू आहे. ही चर्चा सुरू असताना आज भाजप नेते प्रसाद लाड यांनी राज ठाकरे यांची भेट घेतली. त्यामुळे पुन्हा एकदा या चर्चेला उधाण आले आहे.
राज ठाकरे यांना दुखापत झाली होती. त्यामुळे मी त्यांना पाहायला आलो होतो. राज यांच्यासोबतची भेट ही वैयक्तिक भेट आहे. भाजपचा झेंडा महापालिकेत फडकणार, त्यासाठी जे लोक येतील त्यांना आम्ही सोबत घेणार आहोत, असे सूचक वक्तव्य प्रसाद लाड यांनी केले आहे.
भाजपचा झेंडा मुंबई महापालिकेवर फडकणार
राज ठाकरे यांच्यासोबतची भेट वैयक्तिक भेट आहे. वेळ आल्यावर नक्कीच सांगेन. भाजपचा झेंडा महापालिकेवर फडकेल हे मी तुम्हाला आता सांगतो. कांजूरमार्गची जागा ही केंद्र सरकारची आहे. तसेच बालहट्टामुळे मुंबईच्या जनतेवर अन्यात करण्याचे काम सरकार करत असल्याचे प्रसाद लाड म्हणाले. सरकारने जनतेच्या हिताचे काम केले पाहिजेत. बालहट्ट न करता मुंबईच्या जनतेसाठी निर्णय घ्यावेत, असेही लाड यांनी सांगितले.