पालिकेच्या प्रस्तावांचे वाटप करून लाखोंची कमाई; भाजपकडून अधिकाऱ्यांवर कारवाईची मागणी

पालिकेच्या ( Municipal Corporation ) चिटणीस विभागातील अधिकारी, कर्मचारी कंत्राटदारांना पैसे घेऊन प्रस्ताव देत आहेत. याबाबतची एक ऑडिओ क्लिप ( Audio clip ) बाहेर आली आहे.

मुंबई - पालिकेच्या ( Municipal Corporation ) चिटणीस विभागातील अधिकारी, कर्मचारी कंत्राटदारांना पैसे घेऊन प्रस्ताव देत आहेत. याबाबतची एक ऑडिओ क्लिप ( Audio clip ) बाहेर आली आहे. या प्रकरणाची चौकशी करून दोषी अधिकाऱ्यांवर आणि कर्मचाऱ्यांवर कारवाई करावी, अशी मागणी भाजपचे माजी गटनेते प्रभाकर शिंदे यांनी पालिका आयुक्त ( Municipal Corporation Commissioner ) इकबाल सिंग चहल यांच्याकडे केली आहे.

तक्रारीकडे आयुक्तांचे दुर्लक्ष -

मुंबई महापालिकेचा कार्यकाळ 7 मार्च रोजी संपला आहे. पालिकेचा कार्यकाळ संपल्यावर आयुक्त इकबाल सिंग चहल यांना प्रशासक म्हणून नियुक्त करण्यात आले आहे. आयुक्त प्रशासक झाल्यावर जे प्रस्ताव मंजूर केले जात आहेत. ते माजी नगरसेवकांना दिले जात नाहीत. आरटीआयच्या माध्यमातून हे प्रस्ताव मिळावा, असे सांगितले जाते. मात्र, त्याचवेळी पालिकेच्या चिटणीस विभागातील कर्मचारी अधिकारी पैसे घेऊन कंत्राटदाराना प्रस्ताव देत आहेत. याची तक्रार आयुक्तांना याआधीच दिली आहे. मात्र, आयुक्तांनी त्याकडे दुर्लक्ष केले असा आरोप शिंदे यानी केला आहे.

चिटणीस विभागात भ्रष्टाचार -

पालिकेच्या चिटणीस विभागातील एक अधिकारी या प्रस्तावाच्या प्रती कंत्राटदारांना मिळवून देत आहे. त्यासाठी एका प्रतीमागे ५ हजार ५०० रुपये उकळत आहे. गेल्या 3 महिन्यात जुन्या आणि नवीन प्रस्तावांच्या प्रती कंत्राटदारांना मिळवून देऊन या अधिकाऱ्याने लाखो रुपये गोळा केले आहेत. याची माहिती देणारी एक ऑडिओ क्लिप आयुक्तांना दिली आहे. या क्लीपमध्ये प्रत मिळवून देण्यासाठी किती पैसे लागतील याबाबतचा संवाद अधिकारी व कंत्राटदारमध्ये ऐकू येतो. सरकारी कार्यालयात अशा प्रकारे थेट भ्रष्टाचार सुरू करण्याची अधिकाऱ्यांची ही कृती पालिकेसाठी लाजिरवाणी आहे. या अधिकाऱ्यावर भ्रष्टाचाराचे विविध आरोप यापूर्वी झाले असून त्यांची प्रशासकीय चौकशी देखील झाली आहे. तसेच न्यायालयात खटला सुरू असताना त्यांना पुन्हा पालिकेच्या सेवेत घेण्यात आले आहे, असेही शिंदे यांनी आयुक्तांच्या निदर्शनास आणले आहे.

हेही वाचा -Kishori Pednekar Threat To Kill : मुंबईच्या माजी महापौर किशोरी पेडणेकर यांना जिवे मारण्याच्या धमकीचे पत्र