राज्यात डेल्टा प्लसचे 66 रुग्ण; लसीचे दोन डोस घेतलेल्या 10, तर एक डोस घेतलेल्या 8 जणांना लागण

राज्यात कोरोना विषाणूची दुसरी लाट ओसरत असतानाच डेल्टा प्लस विषाणूच्या प्रसाराला सुरुवात झाली आहे. राष्ट्रीय विषाणू विज्ञान प्रयोगशाळेने ठाण्यात डेल्टा प्लसचा 1 रुग्ण आढळून आल्याचे राज्याच्या आरोग्य विभागाला कळविले आहे. यामुळे डेल्टा प्लसच्या रुग्णांची संख्या 66 झाली आहे.

मुंबई - राज्यात कोरोना विषाणूची दुसरी लाट ओसरत असतानाच डेल्टा प्लस विषाणूच्या प्रसाराला सुरुवात झाली आहे. राष्ट्रीय विषाणू विज्ञान प्रयोगशाळेने ठाण्यात डेल्टा प्लसचा 1 रुग्ण आढळून आल्याचे राज्याच्या आरोग्य विभागाला कळविले आहे. यामुळे डेल्टा प्लसच्या रुग्णांची संख्या 66 झाली आहे. लसीचे 2 डोस घेतलेल्या 10 जणांना, तर एक डोस घेतलेल्या 8 जणांना डेल्टाची लागण झाली आहे. आतापर्यंत डेल्टा प्लसमुळे 5 जणांचा मृत्यू झाला आहे.

हेही वाचा -15 ऑगस्टपासून निर्बंध शिथिल; हॉटेल, मॉल आणि रेस्टॉरेंट राहणार 10 वाजेपर्यंत खुली

19 ते 45 वर्ष वयोगटातील रुग्ण -

ठाण्यात डेल्टा प्लसचा 1 रुग्ण आढळूल आला आहे. 50 वर्षीय महिलेला डेल्टा प्लसची लागण झाली होती. 22 जुलै रोजी या महिलेला सौम्य स्वरुपाचा कोविड आजार झाला होता. ती महिला यातून बरी झाली आहे. आतापर्यंत राज्यात आढळलेल्या 66 डेल्टा प्लस रुग्णांपैकी 32 पुरुष असून 34 स्त्रिया आहेत. सर्वाधिक 33 डेल्टा प्लस रुग्ण 19 ते 45 वर्ष वयोगटातील आहेत, तर त्या खालोखाल 46 ते 60 वर्ष वयोगटातील 18 रुग्ण आहेत. यामध्ये 18 वर्षांखालील 7 बालके असून 60 वर्षांवरील 8 रुग्ण आहेत. 66 पैकी 31 रुग्ण लक्षणे नसलेले किंवा सौम्य लक्षणे असलेले आहेत. यामुळे त्यांच्यावर घरातच उपचार सुरू आहेत.

लस घेतलेल्या 18 जणांना लागण

डेल्टा प्लसच्या 66 रुग्णांपैकी कोरोना प्रतिबंधक लस घेतलेल्या 18 जणांना डेल्टा प्लसची लागण झाली आहे. 18 जणांपैकी 10 जणांनी लसीचे दोन डोस घेतले आहेत. तर, 8 जणांनी लसीचा एकच डोस घेतला आहे. लसीकरण झालेल्यांपैकी 2 व्यक्तींनी कोव्हॅक्सिन तर इतरांनी कोव्हिशिल्ड या लसीचे डोस घेतले होते.

5 रुग्णांचा मृत्यू

66 पैकी 5 रुग्णांचा मृत्यू झाला आहे. त्यात 3 पुरुष 2 स्त्रिया आहेत. रत्नागिरी जिल्ह्यात 2, बीड, मुंबई, रायगड येथे प्रत्येकी एका रुग्णाचा मृत्यू झाला आहे. मृत्यू झालेले पाचही रुग्ण 65 वर्षांवरील असून त्यांना अतिजोखमीचे आजार होते. मृत्यू झालेल्या 2 जणांनी कोव्हिशिल्डचे डोस घेतले होते. 2 जणांनी कोणतीही लस घेतली नव्हती. तर, एकाच्या लसीकरणाबाबत कोणातीही माहिती मिळालेली नाही.

सेंटीनल सर्वेक्षण

राज्यातील 5 प्रयोगशाळा आणि 5 रुग्णालयांची निवड सेंटीनल सेंटर म्हणून करण्यात आलेली आहे. हे प्रत्येक सेंटीनल सेंटर दर पंधरवड्याला 15 प्रयोगशालेय नमुने जनुकीय क्रमनिर्धारणासाठी राष्ट्रीय विषाणू विज्ञान संस्था आणि राष्ट्रीय पेशी विज्ञान संस्था या पुणे स्थित संस्थांना पाठवते.

जिनोमिक सिक्वेन्सिंग

जनुकीय क्रमनिर्धारण म्हणजेच, जिनोमिक सिक्वेन्सिंगला गती मिळावी म्हणून महाराष्ट्र शासनाने, कौन्सिल ऑफ सायंटिफिक अँड इंडस्ट्रीयल रिसर्च संस्थे अंतर्गत काम करणाऱ्या इन्स्टिट्यूट ऑफ जिनोमिक्स अँड इंटिग्रेटेड बायोलॉजी या प्रयोगशाळेसोबत करार केला असून, या नेटवर्कद्वारे दर महिन्याला प्रत्येक जिल्ह्यातून 100 प्रयोगशाळा नमुन्यांची तपासणी करण्यात येते.

हेही वाचा -प्रियकर तुझा की माझा? एका प्रियकरासाठी दोन प्रेयसिंची फ्रिस्टाईल हाणामारी, व्हिडिओ तुफान व्हायरल