मुंबई - मुंबईत 16 जानेवारीपासून महापालिका, सरकारी, खासगी रुग्णालय तसेच कोविड सेंटरमध्ये कोरोना विषाणूवरील लस दिली जात आहे. केंद्र सरकारने लसीकरण करण्यासाठी खासगी रुग्णालयांना परवानगी देण्यात येईल असे स्पष्ट केले होते. त्यानुसार केंद्र सरकारने पंतप्रधान जन आरोग्य योजनेंतर्गत येणाऱ्या 29 रुग्णालयांना लसीकरणाची मान्यता दिली आहे. या रुग्णालयांमधून नागरिकांना 250 रुपये शुल्क देऊन लसीकरण करून घेता येईल, अशी माहिती महापालिका प्रशासनाच्या वतीने देण्यात आली आहे.
29 रुग्णालयांना मान्यता
मुंबईत मागील वर्षाच्या मार्च महिन्यापासून कोरोनाचा प्रादुर्भाव आहे. कोरोनाचा प्रादुर्भाव कमी करण्यासाठी 16 जानेवारीपासून देशभरात लसीकरणाला सुरुवात झाली. मुंबईत आतापर्यंत आरोग्य कर्मचारी, फ्रंटलाईन वर्कर यांना लस देण्यात येत होती. 1 मार्चपासून 60 वर्षांवरील जेष्ठ नागरिक आणि 45 ते 59 वर्षांमधील आजार असलेल्या नागरिकांच्या लसीकरणाला सुरुवात झाली आहे. मुंबई महापालिका, सरकारी रुग्णालय, कोविड सेंटर येथे लस मोफत दिली जाणार आहे. तर खासगी रुग्णालयात 250 रुपयांना ही लस दिली जात आहे. मुंबईत पहिल्याच दिवशी 3 खासगी रुग्णालयांना लसीकरणाची परवानगी दिली होती. आता ज्या खासगी रुग्णालयात 200 खाटांची क्षमता आहे, व जी रुग्णालये पंतप्रधान जन आरोग्य योजनेचा लाभ रुग्णांना देतात अशा 29 रुग्णालयांमध्ये लसीकरणाला केंद्र सरकारने मान्यता दिली आहे.
लसीकरणासाठी या रुग्णालयांना परवानगी