कोल्हापूर : दारूचे दुकान सुरू करण्याचा राज्य सरकारने निर्णय घेतला. त्यानुसार कोल्हापुरात सुद्धा दारूची दुकाने सुरू करण्यासंदर्भात काल आदेश जारी केले. मात्र तळीरामांना अजूनही प्रतीक्षेतच राहावं लागणार असल्याची शक्यता आहे. कारण उत्पादन शुल्क विभागाच्या परवानगीची प्रत अद्याप दुकानदारांना मिळालेली नाहीये. शिवाय सर्वच दुकानं उत्पादन शुल्क विभागाने सील केली आहेत. त्यामुळे कोल्हापुरातील वाईन शॉप अद्यापही बंद आहेत.
दारूची दुकानं सुरू होणार म्हटल्यावर कोल्हापूरातील तळीरामांनी मात्र सकाळी 7 वाजल्यापासूनच दुकानांबाहेर प्रचंड गर्दी केली आहे. शिवाय दुकानदार सुद्धा आता उत्पादन शुल्क विभागाच्या आदेशाची वाट पाहत असून त्यानंतरच दुकान उघडली जाणार आहेत. त्यामुळे आज हे आदेश मिळतील आणि दुकान सुरू होतील याची मात्र शक्यता कमी वाटत आहे. दरम्यान, आता आम्हाला आणखीन वाट पाहायला लावू नका आणि लवकरात लवकर दुकानं सुरू करा अशी मागणी ग्राहक करत आहेत.