कोल्हापूर: फास्ट टॅगच्या नादात सुप्रसिद्ध कवी संदीप खरे यांना सुद्धा कोल्हापूरातल्या किणी टोल नाक्यावर मनस्ताप झाला. फास्ट टॅग स्कॅन झाली नाही त्यामुळे टोल नाक्यावरील कर्मचाऱ्यांनी डबल टोल भरायला सांगितला, मात्र त्याला विरोध करत संदीप खरे यांनी फास्ट टॅग व्यवस्थित स्कॅन करायला भाग पाडले. यामध्ये विनाकारण वेळ गेल्याने संतापलेल्या खरे यांनी फेसबुक वर व्हिडिओ पोस्ट करून आपली नाराजी व्यक्त केली आहे. शिवाय 'टोल नाका आला की टेंशन येते' असे कॅप्शन सुद्धा व्हिडिओला दिले आहे.
★ संदीप खरे यांनी आपल्या पोस्ट मध्ये काय म्हंटले आहे ?फास्ट टॅग मुळे टोल नाक्यावर जास्त वेळ घालवावा लागल्याने कवी संदीप खरे यांनी फेसबुकवर व्हिडिओ पोस्ट करून आपली नाराजी व्यक्त केली आहे. यामध्ये त्यांनी म्हंटले आहे की, कोल्हापूरतल्या किणी टोल नाक्यावर आल्यानंतर आपल्या गाडीवरचे फास्ट टॅग स्कॅन झाले नाही. बरेच वेळा हा त्रास होतो. मात्र तरीही टॅग स्कॅन झाला नाही. त्यामुळे आपल्याला डबल टोल भरावा लागेल, असे तिथल्या एका कर्मचाऱ्याने म्हंटले. मात्र फास्ट टॅगमध्ये बॅलन्स आहे त्यामुळे मी पैसे देणार नाही, म्हणत संदीप खरे यांनी त्यांना टॅग स्कॅन करायला भाग पाडले. यामध्ये त्यांचा तब्बल १० ते १५ मिनिटे वेळ गेला. शिवाय काहींनी त्यांच्यासोबत हुज्जत सुद्धा घातल्याचे संदीप खरे यांनी म्हंटले. त्यामुळे संतापलेल्या खरे यांनी फेसबुकवर व्हिडिओ पोस्ट करून या व्यवस्थेत काहीतरी सुधारणा करण्याची गरज असल्याचे म्हंटले. शिवाय हा 'फास्ट टॅग' नसून 'स्लो टॅग' असल्याची टीका सुद्धा त्यांनी केली आहे.
★ मनसे नेत्या रुपाली पाटील यांनी सुद्धा किणी टोल नाक्यावर केला होता राडादोन दिवसांपूर्वी पुण्यातील महाराष्ट्र नवनिर्माण सेनेच्या नेत्या रुपाली पाटील यांनी सुद्धा किणी टोल नाक्यावर राडा केला होता. २ तास रांगेत उभे राहावे लागल्याने संतापलेल्या रुपाली पाटील यांनी आम्हाला ३ मिनीटांपेक्षा जास्त वेळ आपण रांगेत उभे ठेऊ शकत नाही म्हणत चांगलंच झापले होते. खरंतर प्रत्येकालाच सध्या या समस्येला सामोरे जावे लागत आहे. त्यामुळे प्रशासनाने याकडे लक्ष देऊन यावर ठोस अशी उपाययोजना करणे आता गरजेचे बनले आहे.
