शिवाजी विद्यापीठाच्या कुलगुरूची आज होणार निवड; 'हे' पाचजण आहेत शर्यतीत

कुलपती भगतसिंह कोश्यारी यांनी काल (सोमवारी) कुलगुरुपदासाठी पाच पात्र उमेदवारांच्या ऑनलाइन मुलाखती घेतल्या आहेत. यापैकी एका उमेदवाराची कुलगुरुपदासाठी आज निवड होणार आहे.

कोल्हापूर - शिवाजी विद्यापीठाच्या कुलगुरुची आज निवड होणार आहे. कुलगुरुपदाच्या निवड प्रक्रियेचा अंतिम टप्पा सोमवारी पूर्ण झाला. यामध्ये कुलपतींनी अंतिम यादीमधील पाचही उमेदवारांच्या मुलाखती घेतल्या आहेत. यापैकी एका उमेदवाराची कुलगुरुपदी निवड केली जाईल, अशी माहिती कुलपती कार्यालयाकडून देण्यात आली.

शिवाजी विद्यापीठाच्या कुलगुरुपदावर कोणाची निवड होणार, याची उत्सुकता शिगेला पोहोचली आहे. पदासाठी आलेल्या १६९ अर्जांच्या छाननीपासून सुरू झालेल्या या प्रक्रियेचा शेवटचा टप्पा सोमवारी पार पडला. राज्यपाल तथा पदसिद्ध कुलपती भगतसिंह कोश्‍यारी यांनी डॉ. डी. टी. शिर्के, डॉ. नितीन देसाई, डॉ. कारभारी काळे, डॉ. अविनाश कुंभार आणि डॉ. अंजली कुरणे यांच्या ऑनलाइन मुलाखती सोमवारी संध्याकाळी घेतल्या. प्रत्येक उमेदवाराला १५ ते २० मिनिटांचा वेळ देण्यात आला होता. यापैकी एका उमेदवाची कुलगुरुपदासाठी घोषणा होईल, असे कुलपती कार्यालयाकडून सांगण्यात आले आहे.

जाणून घेऊ कुलगुरुपदाच्या अंतिम यादीतील पाच उमेदवारांचा अल्पपरिचय -

डॉ. कारभारी काळे - प्रभारी कुलगुरू म्हणून काम
डॉ. कारभारी काळे हे औरंगाबाद जिल्ह्यातील आहेत. सालुखेडा हे काळे यांचे मूळ गाव आहे. त्यांनी इंजिनिअरींग टेक्‍नॉलॉजीमध्ये एमएस्सी पीएच.डी. केली आहे. ते सध्या ते डॉ. बाबासाहेब आंबेडकर विद्यापीठात वरिष्ठ प्राध्यापक म्हणून कार्यरत आहेत.

डॉ. नितीन देसाई - २८ वर्षांचा अनुभव
डॉ. नितीन देसाई यांचे गडहिंग्लज तालुक्‍यातील तळेवाडी हे मूळ गाव आहे. त्यांनी शिवाजी विद्यापीठातून वनस्पतीशास्त्र विषयात एमस्सी, पीएच.डी.पर्यंतचे शिक्षण घेतले आहे. ते सध्या मुंबईमधील नरसी मोनजी इस्टिट्यूट ऑफ मॅनेजमेंट स्टडिजमध्ये विज्ञान शाखेचे आधिष्ठाता आहेत.

डॉ. अविनाश कुंभार - केंद्राचे संचालक
डॉ. अविनाश कुंभार मूळचे सांगली जिल्ह्यातील इस्लामपूरचे आहेत. त्यांनी रसायनशास्त्रात एम.एस्सी, पीएच. डी. केली आहे. सध्या ते पुण्याच्या सावित्रीबाई फुले पुणे विद्यापीठात प्राध्यापक आहेत. ते पूर्वी रसायनशास्त्र अभ्यास मंडळाचे अध्यक्ष होते. यापूर्वी ते अद्ययावत उपकरण केंद्राचे संचालक होते.

डॉ. दिगंबर शिर्के - कुलसचिव म्हणून काम
डॉ. दिगंबर शिर्के यांचे मूळ गाव हातकणंगले तालुक्‍यातील वाठार तर्फ वडगाव आहे. त्यांनी शिवाजी विद्यापीठातून संख्याशास्त्र विभागात एमएस्सी, एम.फील, पीएच.डी. केली आहे. विभागप्रमुख, कुलसचिव, प्र-कुलगुरू या पदावर ते कार्यरत आहेत.

डॉ. अंजली कुरणे - पुणे विद्यापीठात कार्यरत
डॉ. अंजली कुरणे येथील शिवाजी पेठेतील आहेत. त्या सध्या सावित्रीबाई फुले पुणे विद्यापीठात मानवशास्त्र शाखेच्या अधिष्ठाता म्हणून कार्यरत आहेत. त्यांनी प्राणिशास्त्र विषयात बी.एस्सी. केले असून मानवशास्त्र विषयात एम.एस्सी. आणि पीएच.डी. केली आहे.