कोल्हापूर - सोशल मीडियावर कालपासून एक व्हिडिओ अक्षरशः धुमाकूळ घातल आहे. ज्यामध्ये एक शिवभक्त तरुण जिवाच्या आकांताने, बेंबीच्या देठापासून सह्याद्री पर्वत रंगांना ओरडून विचारत आहे. ये सह्याद्री सांगशील ( Sahyadri Viral Video kolhapur ) का आमचा राजा कसा होता ? सांगशील का आमचे बाजीप्रभू देशपांडे कसे होते? ज्या छत्रपती शिवरायांच्या तसेच मावळ्यांच्या पराक्रमांमुळे मराठा साम्रास्य उभे राहिले, ज्यांच्यामुळे आजही आपल्याला अनेक गड किल्ले प्रत्यक्षात पाहता येत आहेत. त्याच शिवरायांनी हिंदवी स्वराज्याची निर्मिती करत असताना केलेल्या अनेक लढाया, अनेक शूरवीरांचे बलिदान या सर्वांचा गडकिल्ल्यांनंतर कोण साक्षीदार असेल तो म्हणजे सह्याद्री डोंगर. याच सह्याद्री डोंगर रांगेला आमचा राजा कसा होता सांग म्हणत असलेला तरुणाचा व्हिडिओ सध्या कोल्हापुरात व्हायरल झाला आहे. संतोष नेताजी माने असे या तरुणाचे नाव आहे. तो मार्केट यार्ड परिसरात राहतो.
शिवभक्ताचा व्हिडिओ सोशल मीडियावर :संतोष नेताजी माने हा तरुण गेल्या काही वर्षांपासून गडसंवर्धनाचे काम करतो. शाहू टोल नका येथे एक चायनीजचा व्यवसाय करतो. शिवाय सोशल मीडियावर व्हिडिओ बनविण्याची सुद्धा त्याला आवड आहे. दोन दिवसांपूर्वी तो शाहुवाडी तालुक्यात पर्यटनासाठी गेला होता. येथील पावनखिंड येथे गेल्यानंतर त्याने एक व्हिडिओ बनवला. ज्या पावनखिंड येथे बाजीप्रभू देशपांडे आणि 300 मावळ्यांनी आपल्या प्राणांची आहुती देऊन घोडखिंड लढवली. त्याच पावनखिंडला आणि सह्याद्रीला आमचा राजा कसा होता ? आमचे बाजीप्रभू कसे होते? आमचे मावळे कसे होते ? म्हणत त्याने व्हिडिओ बनवला. संतोष माने याची पत्नी अर्चना माने यांनी हा व्हिडिओ बनवला. हृदयाला भिडणारा हा व्हिडिओ आता अनेकांच्या मोबाईलवर व्हायरल झालेल्या पाहायला मिळत आहे.