अंबाबाईच्या भक्तांना आनंदाची बातमी; दर्शनाची वेळ वाढवली, ई पास सुद्धा मिळणार

कोरोनाच्या पार्श्वभूमीवर मार्चनंतर बंद करण्यात आलेली मंदिरे दिवाळी पाडव्याला उघडण्यात आली. कोरोनाचा प्रसार रोखण्यासाठी काही प्रतिबंधात्मक नियमावली लागू करत दर्शनासाठी परवानगी दिली आहे. अनेक दिवासांपासून मंदिरे बंद असल्याने दर्शनासाठी भाविकांची गर्दी होऊ लागली आहे. त्याचाच विचारकरत कोरोना नियमांचे पालन करत अंबाबाई मंदिरसमितीने दर्शनाच्या वेळत वाढ केली आहे.

कोल्हापूर - अंबाबाईच्या भक्तांसाठी पश्चिम महाराष्ट्र देवस्थान समितीने एक आनंदाची बातमी दिली आहे. कारण अंबाबाईच्या दर्शनाच्या वेळेत आता वाढ करण्यात आली आहे. सकाळी 9 ते 12 या वेळेत मिळणारे दर्शन आता सकाळी 7 ते 12 या वेळेत मिळणार आहे. तर सायंकाळी 4 ते 7 या वेळेत सुद्धा भाविकांना दर्शनाचा लाभ घेता येणार आहे. पश्चिम महाराष्ट्र देवस्थान समितीने हा निर्णय घेतला असून एकाच वेळी गर्दी होऊ नये, शिवाय दर्शन अधिक सुलभ व्हावे यासाठी दर्शनाची वेळ वाढवण्यात आले आहे. देवस्थान समितीचे अध्यक्ष महेश जाधव यांनी याबाबत माहिती दिली आहे.

एका आठवड्यात जवळपास 60 ते 70 हजार भाविकांनी घेतले दर्शन -महाराष्ट्रातील सर्वच मंदिरांचे दरवाजे आठ दिवसांपूर्वी म्हणजेच गेल्या सोमवारपासून उघडण्यात आले आहेत. तब्बल 7 ते 8 महिन्यांनंतर मंदिराचे दरवाजे उघडल्याने मोठ्या प्रमाणात भाविक मंदिरात दर्शनासाठी येत आहेत. कोल्हापुरातील अंबाबाई मंदिरात सुद्धा मोठ्या संख्येने भाविकांनी दर्शन घेतले आहे. आजपर्यंत एका आठवड्यात जवळपास 70 हजार भाविकांनी दर्शन घेतले असल्याची माहिती सुद्धा देवस्थान समितीने दिली आहे. अंबाबाईचे दर्शन आता ई पास द्वारे सुद्धा -अंबाबाईचे दररोज 6 तास दर्शन मिळत होते. मात्र आता ते 2 तासांनी वाढविण्यात आले आहे. त्याचबरोबर भाविकांच्या सोयीसाठी आता ई पासद्वारे सुद्धा अंबाबाईचे दर्शन घेण्याची देवस्थान समितीने व्यवस्था केली आहे. यासाठी देवस्थान समितीचे ऑफिशियल वेबसाईटवर जाऊन फॉर्म भरावा लागेल. फॉर्म भरल्यानंतर ई पास तयार होईल. ई पास असणाऱ्या भक्तांसाठी वेगळी रांग करण्यात येणार असूनही सुविधा संपूर्ण मोफत उपलब्ध करून देण्यात आली असल्याची माहिती देवस्थान समितीचे अध्यक्ष महेश जाधव यांनी दिली आहे. अंबाबाई मंदिरांसह 'या' मंदिराच्या दर्शनाच्या वेळेत सुद्धा वाढ -पश्चिम महाराष्ट्र देवस्थान समितीच्या कार्यक्षेत्रात करवीर निवासिनी महालक्ष्मी अंबाबाई, जोतिबा मंदिर ओढ्यावरील सिध्दीविनायक मंदिर, दत्त भिक्षालिंग सह तीनहजार बेचाळीस मंदिरातील दर्शन वेळेत वाढ करण्याचा निर्णय आज घेण्यात आला आहे. पश्चिम महाराष्ट्र देवस्थान समितीच्या मुख्य कार्यालयात झालेल्या बैठकीत हा निर्णय घेण्यात आला आहे. या बैठकीवेळी सदस्य शिवाजीराव जाधव, राजेंद्र जाधव, सचिव विजय पोवार अभियंता देशपांडे उपस्थित होते.