कोल्हापूर - होळी सण म्हटलं की टिमकी ही आलीच. प्रत्येक गावात आणि शहरातील गल्ल्यांमध्ये आजच्या दिवशी टिमक्यांचा आवाज कानावर पडतोच. संपूर्ण महाराष्ट्रात खरंतर होळी सण साजरा केला जातो. या सणामध्ये टिमक्यांना अनन्य साधारण असे महत्व आहे. मात्र आता हळूहळू चामडी टिमक्यांची जागा प्लास्टिक तसेच फायबरच्या टीमक्यांनी घेतल्याचे सर्रास पाहायला मिळत आहे. कोल्हापुरातल्या बाजारपेठेमध्ये नेमकी कशी परिस्थिती आहे, याबाबत माहिती दिली आहे आमचे प्रतिनिधी शेखर पाटील यांनी..
यंदाही होळी सणावर कोरोनाचे सावट -
गेल्या वर्षी कोरोनाच्या पार्श्वभूमीवर संपूर्ण देशभरात लॉकडाऊन करण्यात आला होता. त्यामुळे होळी सण साजरा करता आला नाही. आता यावर्षी सुद्धा कोरोनामुळे होळी सणावर परिणाम झाला आहे. राज्यात कोरोनाचे रुग्ण वाढत आहेत. शिवाय रात्रीची जमावबंदी सुद्धा जाहीर करण्यात आली आहे. त्यामुळे ज्या पद्धतीने प्रत्येक वर्षी सण साजरा केला जातो त्याच्या तुलनेत नागरिकांमध्ये उत्साह कमी पाहायला मिळत आहे. त्यामुळे सलग दुसऱ्या वर्षी या सणाला कोरोनाचा फटका बसला असल्याचे पाहायला मिळत आहे.