जीएसटी कौन्सिल समितीचे अध्यक्षपद मेघालयला, केंद्राकडून महाराष्ट्राचा अपमान - मुश्रीफ

केंद्रीय अर्थमंत्री निर्मला सीतारामण यांनी शनिवारी जीएसटी कौन्सिल उपसमिती नियुक्त केली. त्याचे अध्यक्षपद मेघालय सारख्या छोट्या राज्यातील अर्थमंत्र्याला दिले. हा पुन्हा एकदा महाराष्ट्राचा अपमान आहे, अशी टीका ग्रामविकासमंत्री हसन मुश्रीफ यांनी केली आहे.

कोल्हापूर -कोरोनावरील उपचारासाठी लागणाऱ्या साहित्यावरील जीएसटी रद्द करावी, अशी मागणी उपमुख्यमंत्री अजित पवार यांनी केंद्र सरकारकडे केली होती. याला अनुसरून केंद्रीय अर्थमंत्री निर्मला सीतारामण यांनी शनिवारी जीएसटी कौन्सिल उपसमिती नियुक्त केली. त्याचे अध्यक्षपद मेघालय सारख्या छोट्या राज्यातील अर्थमंत्र्याला दिले. हा पुन्हा एकदा महाराष्ट्राचा अपमान आहे, अशी टीका ग्रामविकासमंत्री हसन मुश्रीफ यांनी केली आहे.

मुश्रीफ पुढे म्हणाले, वास्तविक महाराष्ट्र सर्वाधिक जीएसटी देतो. महाराष्ट्रात सर्वाधिक कोरोना बाधितांची संख्या आहे. तर मृत्यूंची संख्या ही सर्वात जास्त आहे. सर्वात जास्त कोरोनावरील औषध खरेदी देखील महाराष्ट्रात होते. असे असताना मेघालय सारख्या राज्यात अध्यक्षपद देणे हे महाराष्ट्राचा अपमान आहे.

केंद्र सरकार गेल्या दोन वर्षातील २४ हजार कोटी रुपये महाराष्ट्र सरकारला देणे आहे. रिझर्व्ह बँकेचे एक लाख कोटी मिळून देखील महाराष्ट्र सरकारला ही मदत न देता अपमान केला आहे. पंतप्रधान नरेंद्र मोदी यांनी पश्चिम बंगाल, ओडिशा या राज्याचा दौरा करून या राज्यांना एक हजार कोटीचे पॅकेज दिले. मात्र महाराष्ट्राला चक्रीवादळाच्या नुकसानापोटी एक पैसाही दिला नाही. अशा पद्धतीने केंद्र सरकार आणि नरेंद्र मोदी महाराष्ट्राचा सतत अपमान करत आहेत.असेही मुश्रीफ म्हणाले.

चंद्रकांत पाटलांना मस्ती -

भाजप प्रदेशाध्यक्ष चंद्रकांत पाटलांना मस्ती आली आहे. त्यांनी सातत्याने अनेक नेत्यांच्या विरोधात वाईट विधाने केली आहेत. अशाप्रकारे धमक्या देणं हे चंद्रकांत पाटलांना शोभत नाही. त्यांचे हसू होऊ नये, त्यामुळे असे वक्तव्य त्यांनी टाळावीत, असा सल्ला मुश्रीफ यांनी दिला.

केंद्रीय मंत्री नितीन गडकरी यांचे आभार -

गेल्या अनेक वर्षापासून पुणे- बेंगलूरु महामार्गावरील सातारा ते कराड याचे सहापदरीकरण रखडले होते. याला केंद्रीय मंत्री नितिन गडकरी यांनी मंजुरी दिली आहे. त्यामुळे गेल्या अनेक वर्षापासून रखडलेले काम सुरू होणार असून अनेक प्रवाशांना दिलासा मिळणार आहे. केंद्रीय मंत्री नितिन गडकरी यांनी या कामाला मंजुरी दिल्याबद्दल मी त्यांचे आभार मानतो. अशा शब्दात मुश्रीफ यांनी त्यांच्या कामाचे कौतुक केले.