कल्याणमधील बिर्ला शाळेबाहेर फी वाढीविरोधात पालकांचे आंदोलन, शाळा व्यवस्थापन म्हणते न्यायालयाचा निर्णय मान्य करू

कल्याणमधील बिर्ला इंग्रजी शाळेबाहेर पालकांनी फी वाढीविरोधात (school fee hike) काळ्या फिती बांधून आंदोलन केले. बिर्ला शाळा प्रशासनाने यंदाच्या वर्षी 20 टक्के वाढ केली आहे. ही फी वाढ बेकायदेशीर असल्याचा आरोप पालकांनी करत शाळेबाहेरच ठिय्या आंदोलन करत शाळा प्रशासनाचा निषेध व्यक्त केला. शाळेने फी वाढ मागे घ्यावी, अशी मागणीही केली. हे प्रकरण न्यायालयात प्रलंबित असून न्यायालयाचा जो निर्णय असे तो आम्हाला मान्य असेल, असे शाळा व्यवस्थापनाकडून सांगण्यात आले.

कल्याण (ठाणे) - कल्याणमधील बिर्ला इंग्रजी शाळेबाहेर (B.K. Birla Public School) पालकांनी फी वाढीविरोधात (school fee hike) काळ्या फिती बांधून आंदोलन केले. बिर्ला शाळा प्रशासनाने यंदाच्या वर्षी 20 टक्के वाढ केली आहे. ही फी वाढ बेकायदेशीर असल्याचा आरोप पालकांनी करत शाळेबाहेरच ठिय्या आंदोलन करत शाळा प्रशासनाचा निषेध व्यक्त केला. शाळेने फी वाढ मागे घ्यावी, अशी मागणीही केली.

पालकवर्ग शिक्षण मंत्र्यांसह न्यायालयात धाव घेणार

या आंदोलनानंतर शाळा प्रशासनाने आंदोलन करणाऱ्या पालकांना चर्चेसाठी बोलावले. या चर्चेत शाळा प्रशासनाने ही वाढ मागे घेण्यास नकार दिल्याची माहिती पालकांनी दिली. त्यामुळे यापुढेही शाळे विरोधात आंदोलन करणार असल्याची आपली भूमिका पालकांनी स्पष्ट केली. शाळेच्या या निर्णया विरोधात शिक्षण मंत्र्यांसह न्यायालयात धाव घेणार असल्याचा इशारा पालकांनी दिला.

शाळा प्रशासनाला न्यायालयाचा निर्णय मान्य

याबाबत शाळा प्रशासनाने सांगितले की, कोरोना काळात 2019 पासून आम्ही कोणतीही फी वाढ केली नव्हती. यंदा नियमानुसार फी वाढ केली आहे. ज्या पालकांची आर्थिक परिस्थिती नाही त्यांना फीमध्ये सवलत देण्यात आली आहे. तसेच चार ते सहा टप्प्यात फी भरण्याची मुभा दिली आहे. फी वाढी संदर्भात न्यायालयात प्रकरण प्रलंबित असून न्यायालयाचा जो निर्णय असेल तो आम्हाला मान्य असल्याचे शाळा व्यवस्थापनाकडून सांगण्यात आले.

हे ही वाचा -Diwali 2021 : १७६ देशात डोंबिवलीतील दिवाळी फराळाला पसंती; मात्र महागाईमुळे विक्रीवर परिणाम