Political Party Concentration In Aurangabad: शिवसेनेच्या गडात आता मनसेची डरकाळी: भाजप, राष्ट्रवादीसह इतर पक्षांचा मोर्चा आता औरंगाबादकडे

राष्ट्रवादीच्या नेत्यांच्या जिल्ह्यातील भेटी वाढल्या आहेत. मागील आठवड्यात नेत्या सुप्रिया सुळे, राजेश टोपे यांनी पक्षाच्या कार्यकर्त्यांचा मेळावा घेतला. भाजपचे केंद्रीय मंत्री नितीन गडकरी यांनीही शहरात सभा घेत अनेक घोषणा केल्या. राज ठाकरे यांनी महाराष्ट्र दिनी औरंगाबादेत सभा घेणार असल्याचे जाहीर केल्यानंतर मनसेचे पदाधिकारी शहरात सक्रीय झाले आहेत.

औरंगाबाद - राज ठाकरे यांनी महाराष्ट्र दिनी औरंगाबादेत सभा घेणार असल्याचे जाहीर केल्यानंतर मनसेचे पदाधिकारी शहरात सक्रीय झाले आहेत. मात्र बालेकिल्ल्यात मनसे मुसंडी मारत असल्याचा धसका शिवसेनेने घेतला आहे. त्यामुळे शहरात सध्या मनसे आणि शिवसनेत चांगलीच खडाजंगी (mns Shiv Sena Dispute ) उडत असल्याचे चित्र निर्माण झाले आहे. भाजप, राष्ट्रवादीसह इतर पक्षांनीही शहराकडे मोर्चा वळवला आहे. त्यामुळे लवकरच महापालिकेच्या निवडणुकांचे बिगुल वाजणार असल्याचे स्पष्ट होत आहे.

वीस वर्ष खासदार असूनही शहरात काय विकास केला, भाजपचा सेनेला सवाल -24 एप्रिल रोजी केंद्रीय मंत्री नितीन गडकरी, रावसाहेब दानवे, डॉ. भागवत कराड या भाजप नेत्यांनी रस्त्याच्या उद्घाटनानिमित्त कार्यक्रम घेतला. जिल्ह्यासाठी काही घोषणा नितीन गडकरी यांनी केल्या. त्यात चिकलठाणा - वाळूज पूल आणि औरंगाबाद - पुणे हा नवा मार्ग सुरु करणार असल्याची घोषणा गडकरी यांनी केली. तर डॉ. कराड यांनी व्यासपीठावर बसलेल्या शिवसेना नेते चंद्रकांत खैरे यांच्यावर थेट समोरच टीका करत वीस वर्ष खासदार असताना काय काम केले, (Bjp Criticize To Shiv Sena ) असा जाब विचारला. त्यामुळे सेनेच्या गडात भाजप वरचढ होण्याचा प्रयत्न करत असल्याचे दिसून येत आहे.

शिवसेनेच्या गडात आता मनसेची डरकाळी

राष्ट्रवादी नेत्यांचे दौरे वाढले, महापालिकेची जोरदार तयारी - महाविकास आघाडी सरकारचा घटक असलेल्या राष्ट्रवादीच्या नेत्यांच्या जिल्ह्यातील भेटी वाढल्या आहेत. मागील आठवड्यात नेत्या सुप्रिया सुळे, राजेश टोपे यांनी पक्षाच्या कार्यकर्त्यांचा मेळावा घेतला. 24 एप्रिलला राष्ट्रवादीचे प्रदेशाध्यक्ष जयंत पाटील यांनी कार्यक्रमाला हजेरी लावली, तर 26 एप्रिल रोजी राष्ट्रवादी प्रमुख शरद पवार, उपमुख्यमंत्री अजित पवार, राजेश टोपे, धनंजय मुंडे या नेत्यांनी एकाच व्यासपीठावर दोन कार्यक्रमांना हजेरी लावली. त्यामुळे महापालिकेत जास्त संख्या नसलेली राष्ट्रवादी जिल्ह्यात सक्रिय होऊ पाहत असल्याचे स्पष्ट होत आहे.

शिवसेनेच्या बालेकिल्ल्यात मनसेची डरकाळी -औरंगाबाद शहर शिवसेनेचा बालेकिल्ला समाजाला जातो. मागील तीस वर्षांमध्ये महापालिकेवर सेनेने आपले वर्चस्व कायम ठेवले आहे. यामध्ये भाजपला त्यांनी सोबत घेत निर्विवाद सत्ता गाजवली. हिंदुत्वाच्या मुद्द्यावर सतत सेनेने राजकारण केले. मात्र भाजप सोबत काडीमोड घेताच, भाजपने नागरी सुविधांवरून सेनेला घेरण्याचा प्रयत्न केला. त्यात आता दिवंगत बाळासाहेब ठाकरे नेहमी सभा घेत असलेल्या संस्कृतिक क्रीडा मंडळ मैदानावर राज ठाकरे सभा घेणार असून हिंदुत्वाची किनार त्याला देण्याचा प्रयत्न केला जात आहे. त्यामुळे शिवसेनेचे मतदार फोडण्यासाठी मित्र पक्ष आणि विरोधी पक्ष पुढे सरसावले आहेत का? असा प्रश्न उपस्थितीत केला जात आहे. त्यामुळे शहरातील राजकारण आता कोणत्या वळणावर जाणार हे पाहणे औत्सुक्याचे ठरणार आहे.

माजी जिल्हाध्यक्ष सुहास दाशरथे यांची मनसेला सोडचिठ्ठी - मनसेचे माजी जिल्हाध्यक्ष सुहास दाशरथे यांनी मनसेला सोडचिठ्ठी दिली आहे. त्यानंतर त्यांनी माजी मुख्यमंत्री देवेंद्र फडणवीस आणि चंद्रकांत पाटील यांच्या उपस्थितीत भाजपमध्ये प्रवेश केला. 1 मे च्या सभेआधीच राज ठाकरेंना हा मोठा धक्का बसला आहे, अशी चर्चा औरंगाबादच्या राजकीय वर्तुळात सुरू आहे.

मनसेची संघटना बांधणी करताना 4 महिन्यांपूर्वी राज ठाकरेंच्या दौऱ्यात अचानक दाशरथे यांना पदावरून बाजूला करण्यात आले होते. यानंतर ते मनसे सोडणार अशा चर्चा रंगल्या होत्या, मात्र त्यावेळी सुहास दाशरथे यांनी पक्ष सोडणार नसल्याचे सांगितले होते. दुसरी कुठली जबाबदारी मिळेल, असे वाटत असताना पक्षाने मात्र त्यांच्याकडे पाहिले देखील नाही. पक्षात संधी न मिळाल्याने त्यांनी अखेर भाजपमध्ये प्रवेश केला.