Etv Bharat Special : "तो" झाला घरचा सदस्य; मात्र झाला नाही कुटुंबाचा भाग

चार दिवसांपूर्वी झालटा फाटा येथे काही कुत्र्यांनी हरणाच्या पिल्लाला (Dogs Attacked on Deer) घेरून हल्ला केला आणि त्यात ते जखमी झाल्याची माहिती प्राणीमित्र नितेश जाधव यांना मिळाली. जाधव कुटुंबियांनी पाडसावर उपचार करून जंगलात सोडणार आहे.

औरंगाबाद - एखाद्या कुटुंबियांना प्राण्यांचा लळा लागल्याचं आपण अनेकदा पाहिलं. तसाच काहीसा प्रकार झालटा फाटा येथील जाधव कुटुंबात पाहायला मिळत आहे. या कुटुंबात ते आले. कुटुंबात रमले मात्र चार दिवसात त्याला जावं लागलं. मात्र, काही दिवसांमध्ये त्याने चांगलाच लळा लावला. ते दुसरं तिसरे कोणी नाही तर हरणाचे पिल्लू म्हणजे पाडस होते.

जखमी अवस्थेत सापडले होते हरीण

चार दिवसांपूर्वी झालटा फाटा येथे काही कुत्र्यांनी हरणाच्या पिल्लाला (Dogs Attacked on Deer) घेरून हल्ला केला आणि त्यात ते जखमी झाल्याची माहिती प्राणीमित्र नितेश जाधव यांना मिळाली. आपल्या सहकाऱ्यांसह ते घटनास्थळी धावले. त्यांनी कुत्र्यांच्या तावडीतून त्या पिल्लाची सुटका केली. त्यावेळी त्याच्या शरीरावर चार ते पाच ठिकाणी गंभीर जखमा झाल्याचे दिसून आलं. तातडीने वन विभागाला त्याबाबत माहिती देत त्याला डॉक्टरांकडे नेण्यात आले. त्याच्यावर चार दिवस उपचार करण्याची गरज असल्याने त्या हरिणाला जाधव यांनी आपल्या घरी आणले. जाधव यांच्या कुटुंबीयांनी त्याची घरच्या सदस्यांसारखी काळजी घेतली. आणि तो घरात इतर सदस्यांसारखा वावरू लागला. वनविभागाचे ना हरकत प्रमाणपत्र घेऊन त्याला पुन्हा त्याच्या कळपाजवळ सोडत असल्याची माहिती प्राणीमित्र नितेश जाधव यांनी दिली.

कुटुंबीयांनी घेतली काळजी

जखमी अवस्थेत घरी आलेल्या हरिणाला नितेश यांच्या पत्नी रेश्मा यांनी घरगुती उपाय केले. जखम झालेल्या जागी हळद लावून प्राथमिक उपचार केले. नंतर डॉक्टरांनी दिलेले औषधी लावून त्याची काळजी घेतली. लहान मुलांना लस बाटलीने दूध पाजतो त्या प्रमाणे हरिणाला दूध पाजले. आणि काळजी घेतली. त्यात नितेश यांच्या मुलांनी देखील साथ दिली. वेळोवेळी त्याला चारा देणे , जवळ घेऊन लाड करणे अशी सेवा त्यांनी केली. त्यामुळे चार दिवसातच हरिणाला कुटुंबीयांचा लळा लागला.

घरात हरिणाचा मुक्त वावर

उपचार घेऊन सावरत असताना हरीण जाधव कुटुंबातील सदस्य झाले होते. घरात बसण्यासाठी त्याने आपली विशेष जागा निवडली होती. घरात फिरून झालं की ते त्याच्या जागेवर शांत बसत. पूर्ण घरात मुक्त वावर तो करत आहे. विशेषतः लहान मूल जस आपल्या आईच्या मागे जाते तसं हे हरीण रेश्मा जाधव यांच्या मागेमागे स्वयंपाक घरात वावरत होते. कधी अंगणात, कधी घरात तर कधी घराच्या मागच्या बाजूला तो बिनधास्त वावरत होता. जणू त्या घरातील सदस्यच असल्यासारखा तो राहू लागला होता. मात्र, त्यालाही त्याच्या आईकडे सोडणे गरजेचे आहे, असेही रेश्मा जाधव यांनी सांगितले.

हेही वाचा -Tiger Killed : वाघाला करंट देऊन मारले, मग जमिनीत पुरले; चार आरोपी अटकेत