औरंगाबाद - मिठाई दुकानदाराने आपल्या दुकानातून काम सोडून गेलेल्या कामगारांचे अपहरण करून त्याला मारहाण करत तीन दिवस डांबून ठेवले. हा धक्कादायक प्रकार औरंगाबादमध्ये समोर आला. या प्रकरणी तक्रारदाराच्या तक्रारीवरून वेदांतनगर पोलिसात सहा जणांविरोधात गुन्हा दाखल करण्यात आला आहे.
तक्रारदार मगराज मांगीलाल नाई गेल्या काही वर्षांपासून रेल्वे स्टेशन रोडवरील मधुर मिलन या मिठाईच्या दुकानात काम करत होते. ठरल्याप्रमाणे पैसे मिळत नसल्याने मगराज याने काम सोडून नाशिक येथील नांदगाव येथे दुसऱ्या दुकानात काम सुरू केले. त्याचा राग मनात ठेवत दुकान मालकाने नांदगाव येथून मगराजचे अपहरण केले. त्याला औरंगाबाद येथील गोदामात आणून मारहाण केली, त्यानंतर तीन दिवसांपासून त्याला डांबून ठेवले होते.
औरंगाबादेत कामगाराला अपहरण करून मारहाण
मगराज नाई गेल्या नऊ वर्षांपासून मधुर मिलन या दुकानात कचोरी समोसा तयार करण्याचे काम करत होते. दरमहा 24 हजारांचे वेतन देण्याचे दुकान मालकांनी कबूल केले. मगराज यांचा मुलगा किशोर देखील हरियाणा रोहतक येथून कामाला वडिलांसोबत आला. त्याला 13 हजार वेतन देण्याचे ठरले. मात्र, गेल्या तीन वर्षांपासून दुकान मालकाने दोघांना वेतन दिले नव्हते. वारंवार वेतन मागूनही आश्वासन दिले मात्र वेतन दिले नाही. अखेर मगराज यांचा मुलगा किशोर गावी परतला आणि मगराज नाशिक जिल्ह्यातील नांदगाव येथील दुकानात काम करू लागले.
असे झाले अपहरण -
मगराज नांदगाव येथे दुकानात काम करत असताना मधुर मिलन दुकानाचे मालक दुगलसिंग, त्यांचा मुलगा राजकमल दोन जणांसह तिथे गेले. आमच्या दुकानातील काम का सोडले असे म्हणत त्यांना मारहाण केली. बळजबरीने कार मध्ये बसवून गंगापूर येथील फॅक्ट्रीमध्ये नेत मारहाण केली. औरंगाबाद येथील गोदामात आणून दुकान मालक आणि त्यांच्या भावांनी मारहाण केली. दोन दिवस मगराज यांना डांबून ठेवले. त्यानंतर जीवे मारण्याची धमकी देत दोन दिवस दुकानात काम करायला लावले.
अशी झाली सुटका -
दुकानात काम करत असताना मगराजला तेथून पळण्याची संधी मिळाली. सर्वांची नजर चुकवत मगराजने धूम ठोकली आणि हाकेच्या अंतरावर असलेल्या वेदांतनगर पोलीस गाठले. तिथे पोलिसांनी घडलेला प्रकार सांगत आपली तक्रार दिली. त्यानुसार दुगलसिंग, पदमसिंग, राजुसिंग, राजकमल यांच्यासह दोघांविरोधात गुन्हा दाखल करण्यात आला असून पुढील तपास वेदांतनगर पोलीस करत आहे.