अमरावती -युवासेनेच्या कार्यकर्त्यांनी शुक्रवारी सार्वजनिक बांधकाम विभाचे कार्यकारी अभियंता सदानंद शेडगे यांच्या दालनात गणपतीची स्थापना करून आरती केली. गणपती उत्सव सुरू होण्यापूर्वी शहरातील रस्ते दुरुस्त करण्याची सद्बुद्धी सार्वजनिक बांधकाम विभागाला यावी यासाठी युवासेनेचे जिल्हा उपाध्यक्ष राहुल माटोडे यांच्या नेतृत्वात अनोखे आंदोलन करण्यात आले.
अमरावती शहरात मोठ्या प्रमाणावर रस्ता काँक्रिटिकरणाचे काम सुरू असून एक रस्ता पूर्ण न करता दुसऱ्या रस्त्याचे काम केले जात आहे. सारेच रस्ते अर्धवट फोडले असल्याने अमरावतीकरांना गत वर्षभरापासून त्रास सहन करावा लागत आहे. आता गणपती उत्सव जवळ आला असून खराब रस्त्यांवरून गणरायाची मिरवणूक सुरक्षित जाणार की नाही, अशी शंका असून मूर्ती खंडित झाली तर कोणाला दोषी ठरवायचे, असा प्रश्न उपस्थित करून युवसेनेने वाजतगाजत गणपतीची मूर्ती सार्वजनिक बांधकाम विभागाच्या कार्यकारी अभियंत्यांच्या दालनात आणली.