अमरावती -हलाखीच्या परिस्थितीत जीवन जगत असतांना अनेक संकटांवर मात करत चतुर्थ श्रेणीतील कर्मचाऱ्याच्या एका मुलीने आपल्या वडिलांचे स्वप्न साकार केले आहे. श्री शिवाजी शिक्षण संस्था अमरावती द्वारा संचालित अमरावती जिल्ह्यातील नांदगाव खंडेश्वर, येथील नांदगाव हायस्कूलमध्ये शिकणाऱ्या साक्षी तोटे या विद्यार्थीनीने अमरावती जिल्हाचे नाव उंचावले आहे. साक्षीची जागतिक तिरंदाजी स्पर्धा आणि आशिया कप स्पर्धेकरीता भारतीय संघात निवड झाली आहे.
साक्षीच्या यशाने तिच्या कुटुंबासोबतच गावकऱ्यांचाही आनंद गगनात मावत नव्हता. हरियाणा राज्यातील रोहतक येथे या स्पर्धांची निवड चाचणी पार पडली होती. या चाचणीत साक्षीची भारतीय संघात तिसऱ्या स्थानावर नियुक्ती झाली. आता माद्रिद (Madrid) स्पेन येथे होणाऱ्या जागतिक स्पर्धेकरिता आणि तायपेयी (Taipei) येथे होणाऱ्या आशिया कप स्पर्धेकरिता साक्षी रवाना होणार आहे.
साक्षी तोटेची जागतिक तिरंदाजी स्पर्धा व आशिया कप स्पर्धेकरीता भारतीय संघात निवड अमरावतीच्या नांदगाव सारख्या ग्रामीण भागात गेल्या २१ वर्षांपासून एकलव्य धनुर्विद्या क्रीडा अकादमी येथे साक्षीने प्रशिक्षण घेतले. छत्रपती पुरस्कार प्राप्त सदानंद जाधव यांच्या मार्गदर्शनाखाली धनुर्विद्या या खेळाचे साक्षीने प्राथमिक धडे घेतले. साक्षी आणि तिचे प्रशिक्षक अमर जाधव यांनी घेतलेली मेहनत, जिद्द, सातत्य आणि परिश्रम यामुळेच हे आज शक्य झाले, असे साक्षी तोटे हिने सांगितले. तसेच मी निश्चितच जागतिक तिरंदाजी स्पर्धेत आपल्या देशा साठी सुवर्णपदक मिळवून देशाचा सन्मान वाढविण्यासाठी प्रयत्नाची पराकाष्ठा करेल, असा विश्वास साक्षीने यावेळी व्यक्त केला.
नांदगाव खंडेश्वरमध्ये साक्षीचे आगमन होताच गावकऱ्यांनी जल्लोष केला. यावेळी फटाक्यांच्या आतिषबाजीत आणि ढोल ताश्यात तिची विजयी रॅली काढण्यात आली. यावेळी ठिकठिकाणी तिचा सत्कार करण्यात आला. तसेच, एकलव्य धनुर्विदा क्रीडा अकादमीच्या २४५ विद्यार्थ्यांनी आत्तापर्यंत आंतरराष्ट्रीय स्तरावर बाजी मारली आहे.
