कोरोनामुक्तीचा भारवाडी पॅटर्न! असे झाले हे गाव कोरोनामुक्त!

गावात १५ दिवसांत ५७ रुग्ण आढल्याने कमालीची भीती पसरली होती. त्यामुळे गावात जिल्हा स्तरावरील व तालुका स्तरांवरील आरोग्य अधिकारी यांनी भेटी दिल्या. गावांतील लोकांचे समुपदेशन केले. त्यांना आरोग्य विभागाने योग्य तो औषध साठा दिला. एवढ्या मोठ्या संख्येने रुग्ण आढल्याने गाव प्रतिबंधक क्षेत्र म्हणून घोषित केले. त्यामुळे गावाबाहेर व्यक्तीला गावात प्रवेश नव्हता तर गावातील व्यक्ती गावाबाहेर जात-येत नव्हती.

अमरावती - अमरावती - वर्धा जिल्ह्याच्या सिमेवरील, जिल्ह्यातील शेवटचे गाव असलेल्या जुनी भारवाडी या गावात काही दिवसांपूर्वी कोरोनाने जणू उच्छाद मांडला होता. केवळ तीनशे ते साडेतीनशे लोकसंख्या असलेल्या या गावात केवळ दोन आठवड्यांत कोरोनाचे तबल 57 रुग्ण आढल्याने प्रशासनाची झोप उडाली होती. गाव कोरोनाच्या दहशतीखाली वावरत होते. मात्र त्याच वेळी आरोग्य विभाग, ग्रामपंचायत प्रशासन व गावकऱ्यांनी कोरोनाला आता थांबवायचे हा निर्णय घेतला आणि गावासाठी व स्वतःच्या सुरक्षेसाठी उपाययोजना सुरु केल्या. कोरोना नियमांची कडक अंबलबजावणी गावात अंमलात आणली. त्याचाच फायदा हा जुनी भारवाडी या गावाला झाला. १५ दिवसात ५७ कोरोना बाधित आढळणाऱ्या या गावात मात्र एक महिन्यापासून एकही नवा कोरोना बाधित रुग्ण आढळला नाही.

१५ दिवसांत ५७ कोरोनाबाधित आढळले -

अमरावती जिल्ह्यातील तिवसा तालुक्यातील जुनी भारवाडी हे जवळपास 350 लोकवस्तीचे गाव आहे. मागील एक वर्षांपासून देशात कोरोनाचे सावट आहे. खेड्यापाड्यातील गावोगावी कोरोना शिरकाव झाला. पण भारवाडी या गावाने ११ महिने कोरोनाला गावाच्या वेशीवर रोखले होते. पण यंदा अखेर २५ मार्चला पहिला कोरोनाबाधित रुग्ण आढळला आणि गावात खळबळ उडाली. तेथून तीन दिवसात लगेचच आणखी तीन नव्या रुग्णांची भर त्यात पडली होती. त्यामुळे ग्रामपंचायत प्रशासन, आरोग्य विभागासमोर आव्हान उभे होते. त्यानंतर तालुका आरोग्य अधिकारी कार्यालयामार्फत या गावात कोरोना चाचणी शिबिर घेण्यात आले. त्यात तबल २७ जण नवे कोरोना पॉझिटिव्ह आढळून आले. तेथून तीन दिवसांनी पुन्हा कोरोना चाचण्या घेण्यात आल्या तेव्हा पुन्हा १० कोरोना बाधित आढळून आले. त्यानंतर पुन्हा दोन दिवसांनी कोरोना चाचणी शिबिर घेण्यात आले. तेव्हा १७ जण नवे रुग्ण सापडले होते त्यामुळे केवळ १५ दिवसांत ५७ कोरोनाबाधित आढळणारे जिल्ह्यातील एकमेव गाव जुनी भारवाडी असावे. या गावांतील लहान बालके वगळले तर १०० टक्के लोकांच्या कोरोना चाचण्या झाल्या. जवळपास ३५० लोकसंख्या असलेल्या या गावात एकूण २३१ चाचण्या केल्या गेल्या.

गाव प्रतिबंधक क्षेत्र म्हणून घोषित -

गावात १५ दिवसांत ५७ रुग्ण आढल्याने कमालीची भीती पसरली होती. त्यामुळे गावात जिल्हा स्तरावरील व तालुका स्तरांवरील आरोग्य अधिकारी यांनी भेटी दिल्या. गावांतील लोकांचे समुपदेशन केले. त्यांना आरोग्य विभागाने योग्य तो औषध साठा दिला. एवढ्या मोठ्या संख्येने रुग्ण आढल्याने गाव प्रतिबंधक क्षेत्र म्हणून घोषित केले. त्यामुळे गावाबाहेर व्यक्तीला गावात प्रवेश नव्हता तर गावातील व्यक्ती गावाबाहेर जात-येत नव्हती.

गावात वेळोवेळी पाहणी, तपासणी व फवारणी -

आढळलेल्या रुग्णापैकी ९०% रुग्ण हे लक्षणेरहित असल्याने त्यांना होम आयसोलेशनमध्ये ठेवण्यात आले होते. जे रुग्ण होम आयसोलेशनमध्ये होते त्या रुग्णांच्या घरांवर आयसोलेशनचा बोर्ड लावण्यात आला होता. जे लोक या नियमांचे पालन करणार नाही त्याच्यावर कारवाईचा इशारा देण्यात आला होता. दरम्यान गावातील कोरोना हटवण्यासाठी तालुका आरोग्य अधिकारी डॉ. ज्योत्सना पोटपीटे, सचिव पी. एच. देशमुख, गटप्रवर्तक प्रतिभा मकेशवर, आशा सेविका संगीता कडु, एएनएम, एमपीडब्लू, सिएचओ मार्फत गावात वेळोवेळी पाहणी, तपासणी करण्यात आली. तसेच वेळोवेळी फवारणी त्यामुळे हे गाव कोरोना मुक्त झाले. कारण मागील एक महिन्यापासून या गावात एकही नवा कोरोना बाधित रुग्ण आढळला नाही.

गावातील कोरोनाची साखळी खंडित करण्यात यशस्वी -

एवढ्या छोट्या गावात मोठ्या संख्येने कोरोनाबाधित निघाले. त्यावेळी आम्ही वेळीच निदान करू शकलो व त्या गावातील कोरोनाची साखळी खंडित करू शकलो. आता तिथे 15 एप्रिलपासून एकही नवीन रुग्ण निघाला नाही. ही खूप समाधानाची बाब आहे. तालुका आरोग्य अधिकारी म्हणून माझे आवाहन आहे की, लोकांनी लक्षणे दिसताच कोरोना चाचणी करून घ्यावी. तिवसा तालुक्यात आपण पूर्ण आठवडा कोरोना चाचणी शिबिर घेतले होते. पॉझिटिव्ह आढळल्यास व लक्षणे नसल्यास घरी 14 दिवस होम आयसोलेशनमध्ये राहावे व घरातले व बाहेरचे यांच्या कोणी संपर्कात देऊ नये असे आवाहन तालुका आरोग्य अधिकारि डॉ. ज्योत्सना पोटपीटे यांनी केले आहे.

त्यामुळे आज गाव पूर्णपणे कोरोणामुक्त -

गावात इतक्या प्रमाणात कोरोना पॉझिटिव्ह रुग्ण निघाले त्यामुळे भयावह परिस्थिती निर्माण झाली होती. परंतु आरोग्य विभागाच्या मदतीने आम्ही गावात जागरूकता निर्माण करण्यासाठी प्रयत्न केले. त्याला लोकांनी प्रतिसाद दिला. गावातील संपूर्ण लोकांच्या चाचण्या झाल्या. वेळेवर औषधोपचार व काळजी घेतली गेली. त्यामुळे परिस्थिती नियंत्रणात आली. आज गाव पूर्णपणे कोरोनामुक्त झाले आहे. आपली व आपल्या गावाची प्रत्येकाने जबाबदारी घेऊन काम केले तर आपण ही लडाई नक्कीच जिंकू असे सरपंच मयुरी सचिन राऊत यांनी सांगितले.