अमरावती महानगरपालिका निवडणूक एक सदस्यीय प्रणालीने होणार - आयुक्त प्रशांत रोडे

अमरावती महापालिकेची सार्वत्रिक निवडणूक एक सदस्यीय प्रणालीने होणार आहे. राज्य निवडणूक आयोगाने प्रशासनाला निवडणुकीच्या तयारीला लागण्याचे निर्देश दिले आहेत.

अमरावती -फेब्रुवारी 2022मध्ये अमरावती महापालिकेची सार्वत्रिक निवडणूक एक सदस्यीय प्रणालीने होणार आहे. राज्य निवडणूक आयोगाने प्रशासनाला निवडणुकीच्या तयारीला लागण्याचे निर्देश दिले असून महापालिका प्रशासन निवडणुकीच्या तयारीला लागली आहे.

आठ सदस्यीय समिती गठीत -

एक सदस्यीय प्रणालीने महापालिका निवडणूक होणार असून त्यासाठी योग्य प्रभाग रचना करण्यासाठी महापालिका आयुक्त प्रशांत रोडे यांच्या अध्यक्षतेखाली आठ सदस्यीय समिती गठीत करण्यात आली आहे. या समितीत मनपा उपायुक्त सुरेश पाटील, नगररचना सहसंचालक आशिष उईके, मनीष हिरीडे, बांधकाम विभागातील सुधीर गोटे आणि हेमंत महाजन हे दोन शाखा अभियंता, सिस्टीम मॅनेजर अमित डोंगरे आणि सहायक निवडणूक अधिकारी अक्षय निलंगे यांचा समावेश आहे.

'वॉर्ड रचनेचा कच्चा आराखडा तयार करणार' -

राज्य शासनाने 31 डिसेंबर 2019 रोजी प्रसिद्ध केलेल्या महापालिका अधिनियम 2019 अन्वये बहुसदस्यीय प्रभाग पद्धतीऐवजी एकसदस्यीय प्रभाग प्रणाली लागू करण्यात आली आहे. प्रभाग रचना करताना 2011 ला अमरावती शहराची लोकसंख्या जी 6 लाख 47 हजार 57 इतकी होती. ही लोकसंख्या विचारत घेतली जाणार असून दहा वर्षात वाढलेल्या लोकसंख्येचाही विचार करून शहरात 86 प्रभाग राहणार आहेत. विधानाभ निवडणुकीतील मतदार याद्यांवरून एकसदस्यीय वॉर्डची रचना करण्यात येणार आहे. या संपूर्ण वॉर्ड रचनेचा कच्चा आराखडा पहिल्या टप्प्यात तयार केला जाणार आहे.

अशी होणार वॉर्ड रचना -

वॉर्ड रचना करताना सर्वात आधी उत्तर दिशेकडून सुरुवात होऊन दक्षिणेकडे शेवट केला जाणार आहे. सर्वच वॉर्डची भौगोलिक सलगता ठेवावी लागणार आहे. वॉर्डच्या सीमा रेषा, मोठे रस्ते, गल्ल्या , नाले, डोंगर, उड्डाणपूल आदी नैसर्गिक मर्यादा विचारत घेतली जाणार आहे.

आजपर्यंतच्या सदस्यसंख्या पद्धत्ती -

अमरावती महापालिकेची पहिली निवडणूक 1982मध्ये झाली होती. त्यावेळी एकल सदस्य पद्धती असताना सदस्यसंख्या 78 होती. 1997 मध्येसुद्धा एकल सदस्य पद्धत होती आणि सदस्यसंख्या ही 73 होती. 2002 च्या निवडणुकीत तीन सदस्य पद्धती होती आणि सदस्यसंख्या 81 होती. 2007 च्या निवडणुकीत एकल सदस्त पद्धती होती आणि सद्यस संख्या 81 होती. 2012 च्या निवडणुकीत दोन सदस्यीय पद्धत्ती होती आणि सदस्य संख्या 87 होती. 2017 च्या निवडणुकीत चार सदस्यीय प्रणाली होती आणि सदस्य संख्या 87 होती. आता 2022 च्या निवडणुकीत एकल सदस्य पद्धती राहणार असून सदस्य संख्या 87 राहणार आहे.

हेही वाचा -OBC आरक्षण मिळत नाही, तोपर्यंत स्थानिक स्वराज्य संस्थांच्या निवडणुका घेऊ नका - देवेंद्र फडणवीस