चंदीगड : जीएसटी कौन्सिलची दोन दिवसीय बैठक झाली. सुमारे सहा महिन्यांनंतर, अर्थमंत्री निर्मला सीतारामन यांच्या अध्यक्षतेखाली झालेल्या या बैठकीच्या पहिल्या दिवशी अनेक प्रस्तावांना मंजुरी देण्यात आली. शेवटच्या दिवशी राज्यांना जीएसटी भरपाई वाढवण्याच्या प्रस्तावावर कोणताही निर्णय घेण्यात आला नाही. जीएसटी कौन्सिलने काही वस्तूंवरील सवलत मागे घेण्याचा तर काही वस्तूंवरील दर वाढवण्याचा निर्णय घेतला आहे. यासह आता पॅकेज केलेले आणि लेबल केलेले गव्हाचे पीठ, पापड, पनीर, दही आणि ताक यांच्यावर पाच टक्के कर आकारला जाणार आहे.
दर तर्कसंगतीकरणावर भर - केंद्रीय अर्थमंत्री निर्मला सीतारामन यांनी पत्रकारांना सांगितले की, वस्तू आणि सेवा कर (जीएसटी) परिषदेच्या दोन दिवसीय बैठकीत विविध गटांच्या दरांचे तर्कसंगतीकरण करण्याबाबत करण्यात आलेल्या सूचना स्वीकारण्यात आल्या आहेत. त्यामुळे कर दरांमध्ये बदल झाला आहे. कर दरातील बदल 18 जुलैपासून लागू होणार आहेत. तथापि, कौन्सिलने कॅसिनो, ऑनलाइन गेमिंग आणि हॉर्स रेसिंगवरील अहवाल पुनर्विचारासाठी मंत्री गटाकडे (GoM) पाठवला आहे.
ऑनलाईन गेमिंगचा फेरविचार - गोव्याच्या अर्थमंत्र्यांना कॅसिनोवरील जीएसटी दराबाबत अधिक चर्चा करायची आहे. अशा स्थितीत 'ऑनलाइन गेमिंग' आणि हॉर्स रेसिंगचाही पुन्हा विचार केला जाईल. मंत्री गटाने या तिन्हींवर २८ टक्के जीएसटी लागू करण्याची शिफारस केली होती. या संदर्भातील अहवाल 15 जुलैपर्यंत तयार होणे अपेक्षित आहे. ऑगस्टमध्ये होणाऱ्या परिषदेच्या पुढील बैठकीत त्यावर विचार केला जाईल. मासे, दही, पनीर, लस्सी, मध, सुका मखना, कोरडे सोयाबीन, वाटाणे, गहू आणि इतर तृणधान्ये आणि तांदूळ यांसारख्या उत्पादनांवर आता पाच टक्के जीएसटी लागेल.
बँकेच्या चेकवर 18 टक्के जीएसटी - त्याचप्रमाणे, टेट्रा पॅक आणि बँकेद्वारे जारी केलेल्या धनादेशांवर 18 टक्के जीएसटी आणि ऍटलससह नकाशे आणि चार्टवर 12 टक्के जीएसटी आकारला जाईल. त्याच वेळी, उघड्यावर विकल्या जाणार्‍या ब्रँड नसलेल्या उत्पादनांवर जीएसटी सूट कायम राहील. याशिवाय दररोज 1,000 रुपयांपेक्षा कमी भाड्याने देणाऱ्या हॉटेलच्या खोल्यांवर 12 टक्के दराने कर आकारण्याचे सांगण्यात आले आहे. त्यावर सध्या कोणताही कर आकारला जात नाही. यासोबतच रूग्णालयात रु. 5,000 पेक्षा जास्त रूग्णांसाठी भाड्याने घेतलेल्या खोल्यांवर (आयसीयू वगळून) 5 टक्के जीएसटी आकारला जाईल.