जळगाव-पेट्रोल आणि डिझेलचे दर पुन्हा एकदा भडकले आहेत. त्यामुळे सर्वसामान्य नागरिकांच्या खिशाला झळ पोहोचत आहे. जळगावात बुधवारी पेट्रोलचे दर 91.58 तर डिझेलचे दर 80.51 रुपये प्रति लिटर असे होते. पेट्रोल आणि डिझेलचे दर सातत्याने वाढत असल्याने सर्वसामान्य नागरिकांमधून तीव्र नाराजी व्यक्त केली जात आहे.
अलीकडच्या काळात पेट्रोल आणि डिझेलचे दर सातत्याने वाढत असल्याचे चित्र आहे. पेट्रोल आणि डिझेलचे दर वाढल्याने महागाईत भर पडत आहे. अशा परिस्थितीत सर्वसामान्य नागरिकांचे आर्थिक बजेट कोलमडले आहे. जळगावात गेल्या आठ दिवसात पेट्रोलचे दर प्रति लिटर दीड रुपयांनी वाढले आहेत. त्यामुळे पेट्रोलच्या दरांनी नव्वदीचा टप्पा ओलांडला आहे. डिझेलचेही दर सातत्याने वाढत आहेत. पेट्रोल शंभराच्या तर डिझेल नव्वदीच्या दिशेने वाटचाल करत आहे. इंधनाचे दर वाढल्यानंतर इतर जीवनावश्यक वस्तूंच्या दरातही मोठी वाढ होते. त्यामुळे महागाईचा आलेख वाढत जातो. अशा परिस्थितीत जगायचे तरी कसे? असा सवाल सर्वसामान्य नागरिक उपस्थित करत आहेत.
हेही वाचा-पतमानांकनात सुधारणेचा येस बँकेला फायदा; शेअरच्या किमतीत १० टक्क्यांनी वाढ
केंद्र सरकारला महागाई दिसत नाही का?
पेट्रोल व डिझेलचे दर सातत्याने वाढत असल्याने सर्वसामान्य जनता त्रस्त झाली आहे. यापूर्वी पेट्रोलचे दर 60 ते 70 रुपये लिटर असताना सत्ताधारी भाजपकडून महागाईच्या नावाने आकांडतांडव केले जात होते. पेट्रोल व डिझेलचे दर वाढत असताना केंद्र सरकारला महागाई दिसत नाही का? असा संतप्त सवाल नागरिकांमधून उपस्थित केला जात आहे.