ऐन दिवाळीत पीएमसी ठेवीदारांची आरबीआयच्या कार्यालयासमोर निदर्शने

ईडीच्या ताब्यामध्ये असलेली मालमत्ता विकून ठेवीदारांना रक्कम मिळण्यासाठी न्यायालयात याचिका दाखल करणार असल्याची माहिती ठेवीदारांचे दुसरे प्रतिनिधी हरबन्स सिंग यांनी दिली. बँक ही बुडणाऱ्या जहाजाप्रमाणे आहे. मात्र, ती पुन्हा पूर्ववत व्हावी, अशी अपेक्षा ठेवीदार सतिश थापर यांनी व्यक्त केली.

मुंबई - पंजाब आणि महाराष्ट्र को-ऑपरेटिव्ह बँकेत पैसे अडकलेल्या ठेवीदारांनी ऐन दिवाळीत आरबीआय कार्यालसमोर निदर्शने केली आहेत. बँकेतील पैसे परत करावेत, अशी ठेवीदारांनी मागणी केली आहे.

पीएमसीच्या ठेवीदारांनी वांद्रा कुर्ला कॉम्पलेक्समध्ये निदर्शने केली. त्यानंतर ठेवीदारांच्या प्रतिनिधींनी आरबीआयचे मुख्य सरव्यवस्थापक दर्जाच्या अधिकाऱ्याची भेट घेतली. यावेळी ठेवीदाराच्या प्रतिनिधीने मागणीचे पत्र दिले. यावेळी ठेवीदारांनी 'ब्लॅक दिवाली' असे बॅनर हातामध्ये घेतले होते.

अडचणीत सापडलेल्या बँकेमधील पैसा सुरक्षित असल्याची आरबीआयने खात्री द्यावी, अशी आरबीआय अधिकाऱ्यांना विनंती केल्याचे ठेवीदारांचे प्रतिनिधी जित्शू शेठ यांनी सांगितले. प्रत्येक ठेवीदाराचे पैसे सुरक्षित ठेवण्याला प्राधान्य असल्याचे आरबीआय अधिकाऱ्यांनी सांगितले. तसेच आरबीआयने पीएमसीला ४ हजार कोटींची मदत करावी, अशी त्यांनी विनंती केली.

ईडीच्या ताब्यामध्ये असलेली मालमत्ता विकून ठेवीदारांना रक्कम मिळण्यासाठी न्यायालयात याचिका दाखल करणार असल्याची माहिती ठेवीदारांचे दुसरे प्रतिनिधी हरबन्स सिंग यांनी दिली. बँक ही बुडणाऱ्या जहाजाप्रमाणे आहे. मात्र, ती पुन्हा पूर्ववत व्हावी, अशी अपेक्षा ठेवीदार सतिश थापर यांनी व्यक्त केली.

हेही वाचा-सीएसआरचा जास्तीत जास्त निधी अनाथ आणि दिव्यांग मुलांसाठी खर्च व्हावा - राष्ट्रपती

दरम्यान, गेल्या महिन्यात बँकेत मोठी ठेव असलेल्या चार ग्राहकांचा मृत्यू झाला आहे. यापैकी एका ग्राहकाने बँकेतून पैसे काढता येत नसल्याने आत्महत्या केली आहे. तर आता निदर्शने करणाऱ्यामध्ये अधिकतर वरिष्ठ नागरिक आणि महिलांचा सहभाग आहे.