नवी दिल्ली - अर्थव्यवस्था मंदावणे ही चक्रीय प्रक्रिया असल्याचे सांगत भारतीय अर्थव्यवस्थेची मुलभूत तत्वे मजबूत असल्याचे केंद्रीय माहिती आणि प्रसारण मंत्री प्रकाश जावडकेर यांनी सांगितले. दुसऱ्यांदा सत्तेत आलेल्या मोदी सरकारने 100 दिवस पूर्ण केल्याच्या पार्श्वभूमीवर ते माध्यमांशी बोलत होते.
भारतात 2018 मध्ये थेट विदेशी गुंतवणुकीचे प्रमाण हे चीनहून अधिक होते. ही बाब अर्थव्यवस्था मजबूत असल्याचे सिद्ध करत असल्याचे प्रकाश जावडेकर म्हणाले. अर्थव्यवस्थेला मजबूत धक्का बसलेला नाही, याकडे त्यांनी लक्ष वेधले.
हेही वाचा-ऑटोमोबाईल क्षेत्रात मंदीचे सावट; महिंद्रासह मारुतीच्या वाहन विक्रीत ऑगस्टमध्ये घसरण
पुढे ते म्हणाले, देशाची अर्थव्यवस्था 2024 पर्यंत 5 लाख कोटी डॉलरची होवू शकणार आहे. अर्थव्यवस्था ही भक्कम पायावर उभी आहे. सरकारच्या प्रशासकीय मॉडेलमुळे अनेक नवे उद्योग येत आहेत. तसेच विदेशी गुंतवणूकदारांसाठी नियमात बदल करण्यात आला आहे. सरकारला अधिकाधिक विदेशी गुंतवणूक निधी व मागणीची (डिमांड) अपेक्षा आहे. सध्याची अर्थव्यवस्थेची स्थिती म्हणजे केवळ 'पॅच' असल्याचे ते म्हणाले.