कोलकाता- कोरोनाच्या संकटानंतर अर्थव्यवस्था सावरण्याच्या वेळेवर अर्थतज्ज्ञांनी संशय व्यक्त केला आहे. कोरोनाचा संसर्ग पसरत असण्याच्या टप्प्यावरच अर्थव्यवस्था मंदावण्यास सुरुवात झाल्याकडे अर्थतज्ज्ञांनी लक्ष वेधले आहे. नुकतेच पंतप्रधान नरेंद्र मोदी यांनी अर्थव्यवस्थेत सुधारणांचे हरित कोंब दिसत असल्याचे प्रतिपादन केले होते.
इंडियन चेंबर ऑफ कॉमर्सच्यावतीने आयोजित वेबिनारमध्ये विविध अर्थतज्ज्ञांनी देशाच्या विकासदाराविषयी मत व्यक्त केले. यावेळी राष्ट्रीय सार्वजनिक वित्त आणि धोरण या स्वायत्त संशोधन संस्थेचे संचालक रतिन रॉय म्हणाले, की उपभोगतता आणि गुंतवणुकीतील घसरण ही सरकारच्या वाढत्या खर्चाशी जुळत नाहीत. केंद्र सरकारही व भारतीय रिझर्व्ह बँक हे दोन्ही अर्थव्यवस्थेला वाचवू शकत नाहीत. खासगी संस्थांनीच अर्थव्यवस्थेचा विकासदर वाढविण्यासाठी आश्वस्त करण्याची गरज आहे. त्यासाठी पुढाकार घेण्याची गरज आहे.