मुंबई - देशातील सर्वात मोठी बँक असलेल्या स्टेट बँक ऑफ इंडियाने ठेवीदारांची चिंता वाढविणारा निर्णय घेतला आहे. एसबीआयने ठेवीवरील व्याजदरात १५ ते ७५ बेसिस पाँईटने कपात केली आहे. तर एमसीएलआरमध्ये ५ बेसिस पाँईटने कपात केली आहे. हे कमी होणारे कर्जाचे व्याजदर १० नोव्हेंबरपासून लागू होणार आहेत.
हेही वाचा-खूशखबर! स्टेट बँकेचे कर्ज स्वस्त; सहाव्यांदा एमसीएलआरमध्ये १० बेसिस पाँईटने कपात
चालू आर्थिक वर्षात एसबीआयने सातव्यांदा कर्जाचे व्याजदर कमी केले आहेत. या कपातीनंतर व्याजदर हे ८ टक्क्यापर्यंत येतील, असे एसबीआयने म्हटले आहे. व्यवस्थेत चलनाचा पुरेसा साठा असल्याने एसबीआयने ठेवीवरील व्याजदर कमी केले आहेत.
हेही वाचा-स्टेट बँकेकडून बचत करणाऱ्यांना झटका; ठेवीवरील व्याजदरात कपात
कमी कालावधीच्या किरकोळ ठेवीवरील व्याजदरात १५ बेसिस पाँईटने कपात केली आहे. यामध्ये एक वर्ष ते २ वर्षांच्या कालावधीच्या मुदत ठेवींचा समावेश आहे. तर २ वर्षांहून अधिक कालावधी असलेल्या मुदत ठेवीवरील व्याजदर हे ३० ते ७५ बेसिस पाँईटने कपात केली आहे. एक बेसिस पाँईट म्हणजे ०.०१ टक्के याप्रमाणे व्याजदर कपात होणार आहे.
जाणून घ्या, काय आहे एमसीएलआर-
मार्जिनल कॉस्ट ऑफ फंड्स बेस्ड लेडिंग रेट्स (एमसीएलआर) ही भारतीय रिझर्व्ह बँकेने निश्चित केलेली पद्धत आहे. याचा वापर करून वाणिज्य बँकांकडून देण्यात येणारे कर्जाचे व्याज ठरविले जातात. याचा वापर बँकांकडून नोटाबंदीनंतर सुरू करण्यात आला. एमसीएलआरच्या अंमलबजावणीच्या ग्राहकांना फायदा होतो. कारण आरबीआयकडून रेपो दरात कपात झाल्यानंतर बँकांना कर्जाचे व्याजदर कमी करावे लागतात.
