जगातील सर्वात मोठा इलेक्ट्रिक दुचाकी प्रकल्प तामिळनाडूमध्ये होणार; ओलाची घोषणा

ओलाच्या उत्पादन केंद्रामुळे थेट १० हजार नोकऱ्यांची निर्मिती होणार आहे. तर त्याचबरोबर ओलाचे पुरवठादार आणि विक्रेते यांना नोकऱ्या मिळणार आहेत.

नवी दिल्ली- एलॉन मस्क यांच्या मालकीची टेस्ला ही भारतात प्रवेश करण्याच्या तयारीत असतानाच देशातील इलेक्ट्रिक बाजारपेठेत आणखी स्पर्धा निर्माण झाली आहे. ओलाने जगातील सर्वात मोठ्या इलेक्ट्रिक दुचाकी उत्पादन केंद्राची घोषणा केली आहे. या ओला फ्युचर फॅक्टरीच्या उत्पादन केंद्रामधून वार्षिक १ कोटी वाहनांचे उत्पादन घेण्याचे उद्दिष्ट निश्चित करण्यात आले आहे. हे तामिळनाडूमधील उत्पादन केंद्र २०२२ पर्यंत पूर्ण क्षमतेने सुरू होणार आहे.

ओलाच्या उत्पादन केंद्रामुळे थेट १० हजार नोकऱ्यांची निर्मिती होणार आहे. तर त्याचबरोबर ओलाचे पुरवठादार आणि विक्रेते यांना नोकऱ्या मिळणार आहेत. ओला फॅक्टरची सीईओ तथा चेअरमन भाविष अग्रवाल यांनी उत्पादन प्रकल्पाचा पहिला टप्पा जून अखेर सुरू होणार असल्याचे सांगितले आहे.

हेही वाचा-आंतरराष्ट्रीय बाजारात कच्चे तेल प्रति बॅरल ७० डॉलर; देशात इंधनाचे दर 'जैसे थे'

असा असेल उत्पादन प्रकल्प-

पहिल्या टप्प्यात वार्षिक २० लाख वाहनांचे उत्पादन घेणे शक्य होणार आहे. हा उत्पादन प्रकल्प तामिळनाडूमधील कृषीनगरी जिल्ह्यातील ५०० एकरांमध्ये सुरू करण्यात येणार आहे. या कारखान्यात १० उत्पादन लाईन्स पूर्ण क्षमतेने सुरू होणार आहेत. कारखान्यामध्ये कृत्रिम मानवी बुद्धिमत्तेवर असणारे ३ हजार रोबोट असणार आहेत. हे रोबोट उद्योगाच्या ४. तत्वावर तयार करण्यात आलेली आहेत. उत्पादनामध्ये बॅटरी ते सर्व वस्तुंचे उत्पादन घेण्यात येणार आहे.

हेही वाचा-कोरोनाशी लढा: टीव्हीएस कंपनी सर्व कर्मचाऱ्यांसह कुटुंबियांना देणार मोफत लस

ओलाने इलेक्ट्रिक स्कूटरची झलकही प्रदर्शित केली आहे. नुकतेच टेस्लाने इलेक्ट्रिक वाहनांच्या उत्पादनासाठी बंगळुरूमध्ये मुख्य कार्यालयाची नोंदणी केली आहे.