येस बँकेचा दणका; कोट्यवधींचे कर्ज थकविणाऱ्या अनिल अंबानींच्या मुख्यालयावर जप्ती

रिलायन्स इन्फ्रास्ट्रक्चरने कर्ज थकविल्याने येस बँकेने कंपनीच्या मुख्यालयासह दक्षिण मुंबईमधील दोन फ्लॅट ताब्यात घेतले आहेत. ही माहिती येस बँकेने बुधवारी वर्तमानपत्रात जाहीर केलेल्या नोटीसमध्ये दिली आहे.

मुंबई- कोट्यवधींचे कर्ज थकविणाऱ्या अनिल अंबानी यांच्यावर येस बँकेने मोठी कारवाई केली आहे. बँकेने सांताक्रुजमधील अनिल अंबानी ग्रुपच्या मालकीचे मुख्यालयावर जप्ती आणली आहे. अनिल अंबानी ग्रुपने येस बँकेचे 2 हजार 892 कोटी रुपये थकविले आहेत.

रिलायन्स इन्फ्रास्ट्रक्चरने कर्ज थकविल्याने येस बँकेने कंपनीच्या मुख्यालयासह दक्षिण मुंबईमधील दोन फ्लॅट ताब्यात घेतले आहेत. ही माहिती येस बँकेने बुधवारी वर्तमानपत्रात जाहीर केलेल्या नोटीसमध्ये दिली आहे. अनिल धिरुभाई कंपनी ग्रुपच्या सर्व कंपन्यांचे काम सांताक्रुझ येथील मुख्यालय असलेल्या कार्यालयामधून काम चालते. हे कार्यालय रिलायन्स सेंटर नावाने ओळखले जाते.

येस बँकेने रिलायन्स इन्फ्रास्ट्रक्चरकडे 6 मे रोजीप्रमाणे 2 हजार 892.44 कोटी रुपये थकित असल्याचे म्हटले आहे. कंपनीला कर्ज फेडण्याची 60 दिवसांची नोटीस देवूनही थकित पैसे भरले नाहीत. त्यानंतर येस बँकेने 22 जुलैला रिलायन्स इन्फ्राच्या तीन मालमत्ता ताब्यात घेतल्या आहेत. या मालमत्तेशी कोणताही आर्थिक व्यवहार करू नये, असे येस बँकेने म्हटले आहे. ही मालमत्ता कर्जवसुलीशी संबंधित असल्याचे येस बँकेने म्हटले आहे.

आर्थिक अडचणीत सापडल्याने कंपनीने 21 हजार 432 स्क्वेअर मीटरचे रिलायन्स केअर हे भाड्याने देण्याचा प्रयत्न केला होता. रिलायन्स इन्फ्राचे दक्षिण मुंबईत दोन मजली नागिण महल ही मालमत्ता आहे. हे दोन मजले प्रत्येकी 1 हजार 717 आणि 4 हजार 936 स्क्वेअर मीटरचे आहेत.

आर्थिक संकटात आहे रिलायन्स इन्फ्रास्ट्रक्चर

दरम्यान, बुडित कर्जामुळे येस बँक आर्थिक संकटात आहे. त्यामध्ये रिलायन्स इन्फ्राच्या बुडित कर्जाचाही समावेश आहे. रिलायन्स इन्फ्रावर 6 हजार कोटींचे कर्ज असल्याचे अनिल अंबानी यांनी 23 जूनला म्हटले होते. हे कर्ज चालू आर्थिक वर्षात फेडू, असा त्यांनी दावाही केला होता. कंपनीने 2018 मध्ये मुंबईमधील वीज उद्योग हा अदानी ट्रान्समिशनला सुमारे 18 हजार 800 कोटी रुपयांना विकला होता. त्यामधून कंपनीने 7 हजार 500 कोटी रुपयांचे कर्ज फेडले होते.