चीनच्या मालावरील आयात कर मागे घेण्यावर सहमत नाही : डोनाल्ड ट्रम्प

आर्थिक आकडेवारीनुसार व्यापारी युद्धाचा अमेरिकेच्या उद्योगांनाही फटका बसला आहे. तर दोन्ही आर्थिक महासत्तामध्ये अनिश्चितता निर्माण झाली आहे. जागतिक अर्थव्यवस्थेलाही खीळ बसली आहे.

वॉशिंग्टन -अमेरिका-चीनमधील व्यापारी युद्ध शमण्याची चिन्हे असताना अमेरिकेचे राष्ट्राध्यक्ष डोनाल्ड ट्रम्प यांनी वेगळीच भूमिका घेतली आहे. चीनमधील उत्पादित मालावरील कर मागे घेण्यावर आपण सहमत नसल्याचे ट्रम्प यांनी म्हटले आहे. ते व्हाईट हाऊसमध्ये माध्यमांशी बोलत होते.

गेल्या महिन्यात अमेरिका-चीनने अंशत: झालेल्या कराराची घोषणा केली होती. त्याचाच भाग म्हणून दोन्ही देश अतिरिक्त आयात शुल्क काढून टाकण्यावर सहमत झाल्याचा दावा चीनने केला होता. दोन्ही देशामधील व्यापारी युद्ध शमणार असल्याने जगभरातील शेअर बाजाराच्या निर्देशांकात सुधारणा झाली होती.

व्यापारी वादाने अमेरिकेतील कंपन्या आणि ग्राहकांना फायदा झाल्याचा दावा डोनाल्ड ट्रम्प यांनी केला. ते म्हणाले, आयात शुल्क मागणे घेण्याची त्यांची (चीन) इच्छा आहे. मला ते मान्य नाही, असे त्यांनी माध्यमांना सांगितले.

हेही वाचा-'आर्थिक सुधारणा लागू केल्याने अर्थव्यवस्थेला पुन्हा उभारी येईल'

आयात शुल्क काही प्रमाणात मागे घेण्याची चीनची इच्छा आहे. त्यांना माहित आहे, मी पूर्णपणे आयात शुल्क मागे घेणार नाही. खरोखर, त्यांना माझ्यापेक्षा अधिक करार करण्याची इच्छा आहे. करारावरील सह्या सुरुवातीला आमच्या देशात केल्या जातील, असेही त्यांनी सांगितले. अर्थव्यवस्थेला फटका बसल्याने चीन करार करण्यासाठी उत्सुक असल्याचा ट्रम्प यांनी पुनरुच्चार केला.

हेही वाचा-विदेशी गंगाजळीत ३.५१ अब्ज डॉलरची वाढ; आरबीआयची आकडेवारी

आर्थिक आकडेवारीनुसार व्यापारी युद्धाचा अमेरिकेच्या उद्योगांनाही फटका बसला आहे. तर दोन्ही आर्थिक महासत्तामध्ये अनिश्चितता निर्माण झाली आहे. जागतिक अर्थव्यवस्थेलाही खीळ बसली आहे.

दोन्ही देश हे अतिरिक्त आयात शुल्क मागे घेण्यावर सहमत असल्याचे चीनच्या वाणिज्य मंत्रालयाचे प्रवक्ते गाओ फेंग यांनी गुरुवारी म्हटले होते. त्याबाबत शेवटच्या टप्प्यात करार आल्याचेही त्यांनी सांगितले होते.