अमूल पाठोपाठ मदर डेअरीकडून दुधाच्या दरात प्रतिलिटर २ रुपयाने वाढ

दूध उत्पादकांना चांगला दर देणे, हे दूध दरवाढीचे मुख्य कारण असल्याचे कंपनीने म्हटले आहे.

नवी दिल्ली - अमूलने नुकतेच दुधाच्या दरात प्रतिलिटर २ रुपयाने वाढ केली आहे. यानंतर मदर डेअरीकडूनही ग्राहकांना दरवाढीचा फटका बसणार आहे. मदर डेअरीने प्रतिलिटर २ रुपयाची दरवाढ आजपासून लागू केली आहे.

मदर डेअरी ही नवी दिल्लीमधील ग्राहकांना दुधाचा पुरवठा करणारी आघाडीची कंपनी आहे. गेल्या दोन वर्षात प्रथमच मदर डेअरीने दरवाढ केली आहे. ही दरवाढ फक्त पॅक असलेल्या दुधासाठी आहे. खुल्या दुधाच्या विक्रीसाठी (टोकन मिल्क) दरवाढ करण्यात आली नाही.

१ लिटर दुधाचे दर १ रुपयाने तर अर्ध्या लिटर दुधाचा दर २ रुपयाने वाढविण्यात आला आहे. त्यामुळे बहुतांश ग्राहकांना केवळ १ रुपयाची दरवाढ सोसावी लागणार असल्याचे मदर डेअरीने म्हटले आहे. मदर डेअरीकडून नवी दिल्लीत ३० लाख लिटरहून अधिक दुधाचा पुरवठा केला जातो.

दूध दरवाढीचे हे आहे कारण -

गेल्या तीन ते चार महिन्यात दूध उत्पादनाच्या खर्चात सातत्याने वाढ होत आहे. कारण पशुखाद्याचे आणि मजुरीचे दर १५ ते २० टक्क्याने वाढले आहेत. असे असले तरी गतवर्षीच्या तुलनेत शेतकऱ्यांना सात ते आठ टक्के अधिक दुधाची किंमत देण्यात आल्याचा दावा मदर डेअरीने केला आहे. याचबरोबर दुधाच्या किमती नियंत्रणात ठेवण्यात आल्या होत्या.

दूध उत्पादकांना चांगला दर देणे, हे दूध दरवाढीचे मुख्य कारण असल्याचे कंपनीने म्हटले आहे. गायीच्या दुधाच्या एक लिटरच्या पॅकेटचे दर पूर्वीप्रमाणेच आहेत. मात्र, अर्ध्या लिटरच्या पॅकेटचा दर हा एक रुपयाने वाढून २२ रुपये होणार असल्याचे कंपनीने म्हटले आहे.