नवी दिल्ली - केंद्र सरकार ग्राहकांना विक्रेत्यांकडून जीएसटीचे बिल घेण्यासाठी प्रोत्साहन देण्याकरता लॉटरी काढण्यावर विचार करत आहे. यामध्ये १० लाख रुपये ते १ कोटी रुपयापर्यंत लॉटरीचे बक्षीस ग्राहकांना मिळू शकणार आहे.
केंद्रीय अप्रत्यक्ष कर आणि उत्पादन शुल्क मंडळाचे (सीबीआयसी) सदस्य जॉन जोसेफ यांनी जीएसटी लॉटरीची माहिती दिली. ते म्हणाले, वस्तू व कर साम्राज्यात प्रत्येक ग्राहकाला लॉटरी जिंकण्याची संधी आहे. हे कर भरण्यासाठी प्रोत्साहन देण्यासारखे आहे. जीएसटीचे प्रत्येक बिल हे लॉटरीचे तिकिट मानण्यात येणार आहे. त्यामुळे ग्राहकाला १ कोटी अथवा १० लाख रुपये जिंकण्याची संधी मिळणार आहे. हे ग्राहकाचे वर्तन बदलण्यासाठी असल्याचे जोसेफ यांनी सांगितले.