सोने ३५ हजारी, विक्रमी भाववाढी मागची ही आहेत कारणे

डॉलर व तेल इंधन हे दोन्ही घटक प्रतिकूल असल्याने गुंतवणुकदारांनी सोन्यातील गुंतवणुकीला पसंती दर्शविली आहे. सोन्यातील गुंतवणूक ही सुरक्षित मानली जाते.

नवी दिल्ली - लग्नसराई आणि अक्षयतृतीया संपूनही सोन्याचा दर गेली सहा दिवस वाढत आहे. मल्टी कमोडिटी एक्सचेंजची (एमसीएक्स) सोन्याच्या कंत्राटाची मुदत ऑगस्टमध्ये संपत आहे. अशा स्थितीत सोन्याचा दर ३७० रुपयाने वाढून प्रति तोळा ३४ हजार ८११ रुपये झाला. अमेरिका आणि इराणमधील भौगोलिक-राजकीय तणावांमुळे जगभरातील गुंतवणूकदार चिंतेत आहेत. अशा स्थितीत त्यांनी सुरक्षित गुंतवणुकीकरता सोन्यामधील गुंतवणुकीचे प्रमाण वाढविले आहे.

गेल्या आठवड्यात अमेरिकेच्या मध्यवर्ती बँकेने व्याजदरात कपात करण्याचे संकेत दिले आहे. अमेरिकेच्या आगामी मध्यवर्ती बँकेच्या खुल्या बाजाराच्या समितीच्या बैठकीत (एफओएमसी) व्याजदाराच्या कपातीचा निर्णय होवू शकतो. आतंरराष्ट्रीय बाजारपेठेत सोन्याचे दर वाढले आहेत. याचा परिणाम म्हणून गेल्या सहा वर्षातील सोन्याच्या किमतीने उच्चांक गाठला आहे. डॉलर आणखी कमकुवत होण्याची शक्यता असल्याचे केडिया इन्व्हेस्टर्सच्या अहवालात म्हटले आहे.

कच्चे तेल आणि डॉलर हे आहेत गुंतवणुकीच्या निर्णयातील महत्त्वाचे घटक
अमेरिकेकडून घेण्यात आलेल्या आर्थिक निर्णयावर डॉलरचा दर अवलंबून असतो. चीनबरोबर व्यापारी युद्ध सुरू असताना अमेरिकचे इराणबरोबरील संबंध तणावाचे झाले आहेत. अशा स्थितीत अमेरिकेच्या मध्यवर्ती बँकेने व्याजदरात कपात करण्याचे संकेत दिले आहेत. डॉलरचे दर घसरल्याने जगभरातील गुंतवणुकीवर परिणाम होतो.

इराण हा तेल इंधन पुरवठा करणारा जगातील आघाडीचा देश आहे. इराणची अमेरिकेबरोबरील तणावाची स्थिती असल्याने कच्च्या तेलाच्या दरावर परिणाम होतो. डॉलर व तेल इंधन हे दोन्ही घटक प्रतिकूल असल्याने गुंतवणुकदारांनी सोन्यातील गुंतवणुकीला पसंती दर्शविली आहे. सोन्यातील गुंतवणूक ही सुरक्षित मानली जाते.

गेल्या सहा दिवसात सोन्याचे दर १० टक्क्याने वाढले आहेत. सोन्याचा प्रति तोळा दर २१ जूनला ३४ हजार ५०० रुपये एवढा होता.