नवी दिल्ली– चिनी उत्पादनांवर बहिष्कार टाकण्याची मागणी होत असताना केंद्र सरकार ई- कॉमर्स कंपन्यांकडून विकण्यात येणाऱ्या उत्पादनांसाठी नवा नियम करणार आहे. या नियमानुसार ई-कॉमर्स कंपन्यांना उत्पादन मूळ कोणत्या देशातील आहे, हे दाखवावे लागणार आहे.
केंद्रीय वाणिज्य मंत्रालयाने अमेझॉन, फ्लिपकार्ट, स्नॅपडील आदी अशा 30 ई-कॉमर्स कंपन्यांच्या अधिकाऱ्यांबरोबर व्हिडिओ लिंकद्वारे चर्चा केली आहे. नव्या नियमाबाबत केंद्रातील वरिष्ठ अधिकारी येत्या दहा ते बारा दिवसात चर्चेची पूर्ण प्रक्रिया करणार असल्याचे सूत्राने सांगितले. ही चर्चा पूर्ण झाल्यानंतर ई-कॉमर्ससाठी उत्पादने कोणत्या देशातील आहेत, हे कंपन्यांना दाखवावे लागणार आहे. सूत्राने सांगितले, की यापुढे भागीदारांशी चर्चा होणार नाहीत. सल्ला घेण्याची प्रक्रिया सुरू आहे. आता, कधी अंमलबजावणी करायची याचा निर्णय सरकार घेणार असल्याचे सूत्राने सांगितले.