केंद्र सरकार कांद्यांचे भाव नियंत्रणात आणण्याकरिता 'हे' उचलणार मोठे पाऊल

देशात तातडीने कांद्याचे ८० कंटेनर आणि त्यानंतर सागरी मार्गाने १०० कंटेनर येणे अपेक्षित असल्याचे ग्राहक व्यवहार मंत्रालयाने म्हटले आहे.

नवी दिल्ली - राजधानीत कांद्याचे भाव कडाडल्याने ८० रुपये प्रति किलोने कांदे विकले जात आहेत. कांदे आयातीवर लागू असलेले काही नियम शिथील करण्यात येणार असल्याचे केंद्रीय ग्राहक व्यवहार मंत्रालयाने स्पष्ट केले आहे. यानंतर अफगाणिस्तान, इजिप्त, तुर्की आणि इराणधील कांद्याची देशात सुलभतेने आयात होणे शक्य होणार आहे.

कांदे आयातीचे नियम शिथील करण्याचा निर्णय आंतरमंत्रिय समितीच्या बैठकीमध्ये घेण्यात आला. या बैठकीच्या अध्यक्षपदी ग्राहक व्यवहार मंत्रालयाचे सचिव अविनाश श्रीवास्तव हे होते. यावेळी त्यांनी देशातील कांद्याच्या किमतीचा आढावा घेतला. येत्या काही दिवसात कांद्याच्या पुरवठ्यात सुधारणा होईल, अशी अपेक्षा असल्याचे केंद्रीय ग्राहक व्यवहार मंत्रालयाने म्हटले आहे. देशात तातडीने कांद्याचे ८० कंटेनर आणि त्यानंतर सागरी मार्गाने १०० कंटेनर येणे अपेक्षित असल्याचे मंत्रालयाने म्हटले आहे.

हेही वाचा-स्थावर मालमत्ता क्षेत्राला पॅकेज देण्याचे केंद्रीय अर्थमंत्र्यांकडून संकेत

विदेशातील राजदूत कार्यालयांची सरकार घेणार मदत-
विदेशातील राजदूत कार्यालये हे स्थानिक व्यापाऱ्यांशी चर्चा करून भारतात कांदे पुरवठा होण्यासाठी प्रयत्न करणार आहेत.

हेही वाचा-हिमाचल प्रदेश : मुलाने निवडलेल्या लॉटरीने पेंटर झाला कोट्यधीश; जिंकले २.५ कोटी

केंद्र सरकारच्या नाफेडला सूचना-
सध्या, निवडक देशातील प्रमाणित अशा कांद्याच्या आयातीला परवानगी आहे. राजधानीमधील कांदे पुरवठा वाढविण्यासाठी नाफेडला सूचना देण्यात आल्या आहेत. नाशिकमधील कांद्याचा साठा किती आहे, हे प्रत्यक्ष तिथे जाणून घेण्याच्या सूचना नाफेडच्या अधिकाऱयांना देण्यात आल्या आहेत. केंद्र सरकारने कांद्याचा अतिरिक्त साठा हा दिल्लीसह एनसीआर भागात कांदा प्रति किलो २४.९० रुपये एवढ्या स्वस्तात विकला आहे. तरीही कांद्याचे भाव अजूनही आटोक्यात आलेले नाहीत.