एलआयसीचा आयपीओ दिवाळीत खुला होणार

केंद्रीय निर्गुंतवणूक सचिव तुहीन कांत पांडे म्हणाले की, एलआयसी ही केंद्र सरकारची गुंतागुंतीची कंपनी आहे. मात्र, केंद्र सरकार आव्हान म्हणून ऑक्टोबरनंतर आयपीओ खुला करणार आहे.

नवी दिल्ली -बहुचर्चित आणि बहुप्रतिक्षेत असलेल्या भारतीय आयुर्विमा महामंडळाचा (एलआयसी) आयपीओ यंदा दिवाळीत खुला होणार आहे. ही माहिती केंद्रीय निर्गुंतवणूक सचिव तुहीन कांत पांडे यांनी दिली आहे.

केंद्रीय निर्गुंतवणूक सचिव तुहीन कांत पांडे म्हणाले की, एलआयसी ही केंद्र सरकारची गुंतागुंतीची कंपनी आहे. मात्र, केंद्र सरकार आव्हान म्हणून ऑक्टोबरनंतर आयपीओ खुला करणार आहे. आयपीओ ऑक्टोबरमध्ये दिवाळीच्या सुमारास खुला होणार आहे. एलआयसीवर लोकांचा विश्वास आहे. हा विश्वास तुटू द्यायचा नसल्याचे पांडे यांनी सांगितले. एलआयसीचा आयपीओ खुला होण्यासाठी केंद्र सरकारने वित्तीय विधेयक २०२१ मध्ये सुधारणा केल्या आहेत. तसेच केंद्रीय अर्थसंकल्पात एलआयसीचा आयपीओ आणण्यासाठीही मंजुरी देण्यात आलेली आहे. केंद्रीय अर्थमंत्री निर्मला सीतारामन यांनी १ फेब्रुवारीला अर्थसंकल्प सादर करताना सार्वजनिक कंपन्यांचे निर्गुंतवणूक धोरण जाहीर केले आहे.

एलआयसीच्या आयपीओमधून केंद्र सरकारला 2.10 लाख कोटी मिळण्याची अपेक्षा आहे.

हेही वाचा-महिंद्राने परत मागविले १,५७७ डिझेल थर वाहने; इंजिनमध्ये आढळला दोष

आयपीओद्वारे कंपनीची भागीदारी खासगी क्षेत्राकडे जाणार -

दरम्यान, केंद्र सरकारने आयपीओ म्हणजेच इनिशिअल पब्लिक ऑफरिंगच्या माध्यमातून एलआयसीमधील भागीदारी विकण्याची घोषणा केली आहे. एलआयसी सध्या १०० टक्के सरकारी कंपनी आहे. आयपीओद्वारे कंपनीची भागीदारी खासगी क्षेत्राकडे जाणार आहे. यातून जनतेच्या पैशाचा दुरुपयोग होण्याची अधिक चिन्हे असल्याची भीती एलआयसी कर्मचाऱ्यांनी व्यक्त केली आहे.

हेही वाचा-सेबीकडून किशोर बियानीसह त्यांचे बंधु अनिल यांच्यावर एका वर्षाची बंदी

काय आहे आयपीओ?

पैसे जमविण्यासाठी कंपन्या आयपीओ म्हणजेच प्राथमिक समभाग विक्री (इनिशिअल पब्लिक ऑफरिंग) शेअर बाजारात आणत असतात. आयपीओच्या माध्यमातून कंपन्या गुंतवणूकदार संस्थांना तसेच सर्वसामान्य गुंतवणुकादारांना शेअर खऱेदीची संधी देतात. आयपीओ बाजारात आणण्यापूर्वी कंपन्यांना सेबीची परवानगी घ्यावी लागते. आयपीओ म्हणजे थोडक्यात शेअर बाजारात सूचिबद्ध होण्यापूर्वी कंपनीने शेअरची जाहीर केलेली किमान किंमत असते.