अॅपलच्या दमदार आर्थिक कामगिरीनंतर सीईओ झाले अब्जाधीश

टिम कुक यांचे उत्पन्न हे 1 अब्ज डॉलरहून अधिक झाले आहे. त्यामुळे ते अब्जाधीश झाले आहेत. मात्र, कुक यांना अजूनही इतर तंत्रज्ञान कंपन्यांच्या सीईओप्रमाणे संपत्ती मिळविण्यासाठी मोठा पल्ला गाठावा लागणार आहे.

सॅनफ्रान्सिस्को– अॅपलचे सीईओ टिम कुक हे पहिल्यांदाच अब्जाधीश झाले आहेत. आयफोन उत्पादन करणाऱ्या अॅपल कंपनीने आजवरच्या सर्व तिमाहीमधील व्यवसायाचे विक्रम मोडले आहेत. या विक्रमानंतर कंपनी ही जगात सर्वाधिक मूल्य असलेली 1.84 लाख कोटी डॉलर असलेली कंपनी झाली आहे.

टिम कुक यांचे उत्पन्न हे 1 अब्ज डॉलरहून अधिक झाले आहे. त्यामुळे ते अब्जाधीश झाले आहेत. मात्र, कुक यांना अजूनही इतर तंत्रज्ञान कंपन्यांच्या सीईओप्रमाणे संपत्ती मिळविण्यासाठी मोठा पल्ला गाठावा लागणार आहे. अमेझॉनचे संस्थापक आणि सीईओ जेफ बेझोस (187 अब्ज डॉलर), मायक्रोसॉफ्टचे सीईओ बिल गेट्स (121 अब्ज डॉलर) आणि फेसबुकचे सीईओ मार्क झुकेरबर्ग (102 अब्ज डॉलर) यांची अशी संपत्ती आहे.

एका माध्यमाच्या वृत्तानुसार टिम कुक यांच्याकडे 8 लाख 47 हजार 969 शेअर आहेत. त्यांना गतवर्षी वेतनासह भत्ते मिळून 125 दशलक्ष डॉलर मिळाले आहेत. अॅपल कंपनी सध्या 2 लाख कोटी डॉलरचे मूल्याचा टप्पा गाठणार आहे.

गेल्या आठवड्यात कंपनीने जगात सर्वाधिक मूल्य असलेल्या सौदी अरेबियाची तेल कंपनी सौदी अरेम्को कंपनीला मागे टाकले आहे. अॅपलने चांगली आर्थिक कामगिरी केल्याने कंपनीचे शेअर 10.47 टक्क्यांपर्यंत वाढले आहे. त्यानंतर कंपनी सर्वाधिक मूल्य असलेली झाली आहे. अॅपलने 2018 मध्ये 1 लाख कोटी डॉलरचा टप्पा ओलांडला होता. अशी कामगिरी करणारी अॅपल ही अमेरिकेची पहिली कंपनी ठरली होती.