बीजिंग - तैवानच्या एअर डिफेन्स मिसाईल यंत्रणेचे नुतनीकरण करण्यासाठी अमेरिकेने नुकतीच परवानगी दिली आहे. त्यानुसार हे काम अमेरिकेतील ‘लॉकहीड मार्टीन’ या शस्त्रास्त्रे बनविणाऱ्या कंपनीला देण्यात आले आहे. मात्र, अमेरिकेच्या या निर्णयामुळे चीनचा पारा चढला असून त्यांनी लॉकहीड मार्टीन या कंपनीवर निर्बंध घातले आहेत.
'तैवानला शस्त्र विक्री करण्यास चीनचा विरोध आहे. आमची अमेरिकेला विनंती आहे, त्यांनी 'वन चायना पॉलिसी'चा सन्मान राखावा. तैवानला शस्त्र विक्री करु नका, तसेच त्यांच्याबरोबरचे लष्करी संबंध तोडून टाका. त्यामुळे अमेरिका आणि चीन द्विपक्षीय संबंधांना धोका पोहचणार नाही आणि तैवान सामुद्रधुनी परिसरात शांतता आणि सुरक्षितता राहील, असे चिनी परराष्ट्र मंत्रालयाचे प्रवक्ते झाओ लिझिन यांनी पत्रकार परिषदेत सांगितले.