'हा' आहे भारतातील सर्वांत श्रीमंत राजकीय पक्ष, भाजप सर्वाधिक खर्च केल्याने ५ व्या स्थानावर

बसप पाठोपाठ लोकसभा निवडणुकीसाठी त्यांच्याशीच आघाडी केलेला सप (समाजवादी पक्ष) दुसऱ्या स्थानावर आहे. सपच्या वेगवेगळ्या खात्यांमध्ये एकूण ४७१ कोटी रुपये आहेत.

नवी दिल्ली - बहुजन समाज पक्षाकडे सध्या सर्व पक्षांच्या तुलनेत सर्वांत जास्त बँक बॅलन्स असल्याची अधिकृतरीत्या समोर आले आहे. निवडणुकीच्या प्रचारासाठीचा खर्च बसपने २५ फेब्रुवारीला निवडणूक आयोगाला सादर केला आहे. बसपकडे सरकारी बँकांच्या ८ खात्यांमध्ये ६६९ कोटींची संपत्ती आहे. २०१४ च्या निवडणुकीत खातेही उघडू न शकलेल्या बसपने निवडणुकीच्या खर्चानंतर ९५.५४ लाख सध्या शिल्लक असल्याचे सांगितले आहे.

बसप पाठोपाठ लोकसभा निवडणुकीसाठी त्यांच्याशीच आघाडी केलेला सप (समाजवादी पक्ष) दुसऱ्या स्थानावर आहे. सपच्या वेगवेगळ्या खात्यांमध्ये एकूण ४७१ कोटी रुपये आहेत. मध्य प्रदेश, छत्तीसगड, राजस्थान आणि तेलंगणामधील विधानसभा निवडणुकीनंतर पक्षाचा कॅश डिपॉझिट ११ कोटींनी कमी झाला.

काँग्रेस या यादीत तिसऱ्या स्थानावर आहे. काँग्रेसकडे १९६ कोटींचा बँक बॅलन्स आहे. मात्र, ही माहिती गतवर्षी २ नोव्हेंबर रोजी निवडणूक आयोगाला देण्यात आलेल्या माहितीच्या आधार देण्यात आली आहे, काँग्रेसने मध्य प्रदेश, राजस्थान आणि छत्तीसगड विधानसभा निवडणुकीत झालेल्या विजयानंतर आपल्या बँक बॅलेन्सची माहिती अपडेट केलेली नाही.

भाजप या यादीत चक्क काही प्रादेशिक पक्षांच्याही मागे पडला आहे. भाजप टीडीपीनंतर पाचव्या स्थानावर आहे. भाजपाकडे ८२ कोटींचा बँक बॅलन्स आहे. तर, टीडीपीजवळ १०७ कोटी आहेत. दरम्यान, २०१७-१८ मध्ये मिळालेल्या १०२७ कोटींपैकी ७५८ कोटी खर्च करण्यात आले, असा दावा भाजपने केला आहे. कोणत्याही पक्षाकडून खर्च करण्यात आलेली ही सर्वांत जास्त रक्कम आहे.