ढाका - भारतात सुरु असलेल्या आयपीएलमध्ये देशी-विदेशी खेळाडू विक्रमांचा धडाका लावत आहेत तर दुसरीकडे जागतिक क्रिकेटमधील संघ विश्वचषकाच्या तयारीत व्यस्त आहेत. या दरम्यान बांगलादेशच्या सौम्या सरकारने एका नवा विक्रम केला आहे.
सरकारने ढाका प्रीमियर लीगमध्ये नाबाद २०८ धावांची ऐतिहासिक खेळी केली आहे. याचसोबत सौम्या लिस्ट ए क्रिकेटमध्ये द्वीशतक करणारा पहिला बांगलादेशी खेळाडू ठरला आहे. सौम्याची बांगलादेशच्या १५ सदस्यीय विश्वचषक संघात निवड झाली आहे. ही खेळी त्याचा आत्मविश्वास वाढविण्यास नक्कीच मदत होणार आहे.
सौम्याने शेख जमाल धनमोंडी क्लबविरुद्ध खेळताना १५३ चेंडूत नाबाद २०८ धावांची खेळी केली. या खेळीत त्याने १४ चौकार आणि १६ षटकारांची आतषबाजी केली. या धमाकेदार खेळीच्या जोरावर त्याला सामनावीरचा किताब देण्यात आला.