पुणे- पिंपरी-चिंचवड शहरात एका तरुणाकडून एक गावठी पिस्तुल आणि 3 जिवंत काडतुसे गुन्हे शाखेच्या युनिट-5 ने जप्त केले असून त्याला अटक केली आहे. राहुल सुखदेव गराडे (वय-19) असे आरोपीचे नाव असून तो अंगरक्षकाचे काम करत असल्याचे पोलीस तपासात समोर आले आहे. त्याच्याकडून 54 हजार 500 रुपयांचे पिस्तुल आणि काडतुसे जप्त करण्यात आले आहेत.
गराडे बरोबरच पिस्तुल विक्री करणाऱ्या तैजीम अन्वर शेख याला देखील गुन्हे शाखेच्या युनिट 5 च्या कर्मचाऱ्यांनी अटक केली आहे. पोलिसांनी दिलेल्या माहितीनुसार, गुन्हे शाखा युनिट 5 चे सहाय्यक पोलीस निरीक्षक राम गोमारे आणि त्यांचे कर्मचारी गस्त घालत होते. दरम्यान, सोबत असलेले कर्मचारी धनराज किरणाळे आणि दत्ता बनसुडे यांना आरोपी राहुलबद्दल गुप्त माहिती मिळाली. त्या आधारावर पोलिसांनी राहुल यास मावळ तालुक्यातील धामणे येथे सापळा रचून अटक केली.