पाटणा - बिहारचा प्रादेशिक पक्ष लोक जनशक्ती पार्टी (एलजेपी) मध्ये खळबळ उडाली आहे. एलजेपीच्या सहा पैकी पाच खासदारांनी पक्षाध्यक्ष चिराग पासवान यांच्याविरोधात बंड पुकारले असून त्यांना लोकसभेत पक्षाच्या नेत्याच्या पदावरून हटविण्याचा निर्णय घेतला आहे. या हाय व्होल्टेज राजकीय नाटकामुळे एलजेपीवरील चिरागची पकड संपुष्टात येऊ शकते आणि त्यांचे काका पशुपती पारस पक्षाची सूत्रे स्वीकारू शकतात.
तत्कालीन केंद्रीय मंत्री आणि लोक जनशक्ती पक्षाचे संस्थापक रामविलास पासवान यांचे 8 ऑक्टोबर 2020 रोजी निधन झाले. त्यानंतर चिराग पक्षाचे नेतृत्व करीत आहेत.तथापि, चिराग पासवान यांची 5 नोव्हेंबर 2019 रोजी एलजेपीचे राष्ट्रीय अध्यक्ष म्हणून नियुक्ती करण्यात आली. चिराग पासवान यांच्या नेतृत्वात एलजेपीने गेल्या वर्षी बिहार विधानसभा निवडणूक लढविली होती. परंतु पक्षाला केवळ एक जागा जिंकली. वडील रामविलास यांच्या अनुपस्थितीत आणि पक्षाध्यक्षपदी चिराग यांची ही पहिलीच कसोटी होती, ज्यामध्ये ते अपयशी ठरले.
विधानसभा निवडणुकीपूर्वीच चिराग पासवान यांनी नितीशकुमार यांच्या विरोधात मोर्चा उघडला होता. चिराग नितीशकुमारांवर वैयक्तिक हल्ले करीत होते. तर पंतप्रधान नरेंद्र मोदी यांचे कौतुक करतानाही ते थकले नाहीत. जेडीयू आणि लोजपा आणि भाजपा हे पक्ष एनडीएत होते. मात्र, चिराग यांनी जेडीयूच्या उमेदवारांविरूद्धच आपले उमेदवार उभे केले होते. चिराग यांनी नितीशकुमार यांच्याविरोधात सातत्याने केलेल्या वक्तव्यामुळे जेडीयूच्या जागा कमी झाल्या आणि बिहार विधानसभा निवडणूकी 2020 मध्ये भाजपाच्या जागा वाढल्या.
निवडणुकीत खराब कामगिरीमुळे एलजेपी नेते चिराग पासवान यांच्यावर नाराज आहेत. चिरागने नितीशकुमारांशी केवळ शत्रुत्वच मिळवले नाही. तर ते स्वत: च्याच पक्षामध्ये एकटे पडलेले दिसत आहेत. आता त्यांना पक्षाध्यक्षपदावरून काढून टाकण्याची तयारी एलजेपीच्या नेत्यांनी केली. हे सर्व चिराग पासवान यांचे काका आणि खासदार पशुपती पारस यांच्या नेतृत्वात घडत आहे. पशुपती पारस यांनी एलजेपी ताब्यात घेण्यासाठी सापळा रचला आहे. त्यांच्या बाजूने पक्षाचे पाच खासदारही आले आहेत. विधानसभा निवडणुकीत एलजेपीच्या निकृष्ट कामगिरीमुळे पक्षाच्या नेत्यांमध्ये निषेधाची अग्नि पेटत होती, जे आता 'चिराग'समोर वादळ म्हणून उभी राहिलीय.
