बेंगळुरू (कर्नाटक) : भाजपचे ज्येष्ठ नेते बीएस येडियुरप्पा यांच्या नेतृत्वाखाली वीरशैव लिंगायत नेत्यांच्या बैठकीत काँग्रेसविरोधात रणनीती आखण्यात आली आहे. काँग्रेसने लिंगायत समाजाच्या नेत्याला मुख्यमंत्रीपदाचा प्रस्ताव दिला असून, याला काँग्रेसचा मास्टर स्ट्रोक म्हटले जात आहे. यापूर्वी भाजपची सत्ता आल्यानंतर पक्षाच्या प्रमुख नेत्यांची बैठक झाली होती, ज्यामध्ये लिंगायत समाजाच्या नेत्याला मुख्यमंत्री करण्याची घोषणा करण्यात आली होती.
येडियुरप्पा झाले सक्रिय :केंद्रीय संसदीय मंडळाचे सदस्य बीएस येडियुरप्पा यांच्या निवासस्थानी भाजपच्या वीरशैव लिंगायत समाजाच्या नेत्यांची बैठक झाली. मुख्यमंत्री बसवराज बोम्मई, ज्येष्ठ नेते व्ही. सोमन्ना, बंडखोर नेते बसनागौडा पाटील यत्नाल, बी.सी. पाटील, अरविंद बेलाड, शंकर पाटील मुनेनकोप्पा, यांच्यासह २३ नेते भाजपचे प्रदेश प्रभारी अरुण सिंह आणि प्रदेश संघटन सरचिटणीस यांच्या उपस्थितीत झालेल्या बैठकीला उपस्थित होते. भाजपचे दोन ज्येष्ठ नेते जगदीश शेट्टर आणि लक्ष्मण सवदी यांनी पक्ष सोडून काँग्रेसमध्ये प्रवेश केल्यानंतर झालेली ही बैठक महत्त्वाची मानली जात आहे.
भाजपचा निर्णय हायकमांडकडे :सूत्रांनी दिलेल्या माहितीनुसार, या बैठकीत काँग्रेसच्या लिंगायत कार्डाविरोधात रणनीती तयार करण्यावर चर्चा झाली. भाजप पुन्हा सत्तेत आल्यानंतर लिंगायत समाजाच्या नेत्याला पुन्हा मुख्यमंत्री करण्यात येईल, ही बाब प्रचारात समाविष्ट करण्यावर बैठकीत भर देण्यात आला. यासोबतच काँग्रेसला आव्हान देण्याचा निर्णयही घेण्यात आला आहे. याप्रकरणी गुरुवारी हायकमांडच्या नेत्यांशी बोलण्याचा निर्णय लिंगायत नेत्याने घेतला आहे. हायकमांडची संमती मिळाल्यानंतर भाजप या रणनीतीवर पुढे जाईल.