चमोली : उत्तराखंडमधील हवामान समशीतोष्ण आहे. चमोलीत गेल्या तीन दिवसांपासून पडलेल्या पावसानंतर आता बद्रीनाथ धामच्या आसपासच्या शिखरांवर बर्फवृष्टी Snowfall on hills of Badrinath Dham सुरू झाली आहे, त्यामुळे धाममध्येही थंडी पडू लागली आहे. वातावरणात सर्वत्र गारठा जाणवू लागला आहे.
पितृ पक्षामुळे या दिवसांत मोठ्या संख्येने भाविकआपल्या पूर्वजांना पिंड दान देण्यासाठी बद्रीनाथ धाममध्ये पोहोचले आहेत. हवामान खात्याच्या इशाऱ्यानुसार चमोलीत गेल्या तीन दिवसांपासून संततधार पाऊस सुरू आहे. हवामान खात्याच्या सतर्कतेच्या पार्श्वभूमीवर चमोलीच्या जिल्हादंडाधिकाऱ्यांनी जिल्ह्यातील पहिली ते बारावीपर्यंतच्या शासकीय, निमसरकारी शाळांसह अंगणवाडी केंद्रेही गेल्या तीन दिवसांपासून बंद ठेवण्याचे आदेश दिले होते. दुसरीकडे, हवामानाचा इशारा लक्षात घेता नंदा देवी राष्ट्रीय उद्यानातून व्हॅली ऑफ फ्लॉवर्सचा प्रवास काही काळासाठी पुढे ढकलण्यात आला आहे. तर केदारनाथ वनविभागानेही हवामान ठिक होईपर्यंत रुद्रनाथची यात्रा थांबवली आहे.
उत्तराखंडमधील हवामान सतत बदलतआहे. संततधार पावसामुळे जनजीवन विस्कळीत होत आहे. यासोबतच पावसामुळे थंडीही वाढत आहे. डोंगरावर पडणारा पाऊस पाहता हवामान खात्याने आजही अलर्ट जारी केला आहे. उत्तराखंड हवामान विभागाने आज राज्यात मुसळधार ते अतिवृष्टीचा अंदाज वर्तवला आहे. हवामान खात्याच्या म्हणण्यानुसार कुमाऊं आणि गढवाल प्रदेशातील काही भागात जोरदार पाऊस पडण्याची शक्यता आहे. यासोबतच अनेक जिल्ह्यांमध्ये मेघगर्जनेसह पावसाची शक्यता आहे.