आता करा 'ड्राईव्ह इन' लसीकरण; कच्छ प्रशासनाचा उपक्रम

यासाठी तुम्हाला आधी लसीकरणासाठी नाव नोंदणी करुन, ठराविक वेळ निश्चित करावी लागते. यानंतर निश्चित केलेल्या वेळेमध्ये तुम्हाला तुमच्या गाडीत या लसीकरण केंद्रावर जायचे असते. याठिकाणी तुम्हाला फक्त तुमचा नंबर येण्याची वाट पहावी लागते. तुमचा नंबर आला, की वैद्यकीय कर्मचारी तुमच्या गाडीजवळ येऊन तुम्हाला लसीचा डोस देतात..

गांधीनगर : एकीकडे लसीकरणासाठी उभारलेल्या केंद्रांवर लांबच लांब रांगा पहायला मिळताना, गुजरातच्या कच्छमध्ये वेगळंच चित्र दिसत आहे. कच्छच्या भुज प्रशासनाने लोकांना आरामात लसीकरण करता यावे यासाठी 'ड्राईव्ह इन व्हॅक्सिनेशन' सुरु केले आहे. यामुळे तुम्हाला लस घेण्यासाठी तुमच्या गाडीतून उतरण्याचीही गरज पडत नाही.

असे काम करते ड्राईव्ह इन लसीकरण..

यासाठी तुम्हाला आधी लसीकरणासाठी नाव नोंदणी करुन, ठराविक वेळ निश्चित करावी लागते. ही नोंदणी कोविन पोर्टल किंवा आरोग्य सेतू अ‌ॅपच्या माध्यमातून करता येते. यानंतर निश्चित केलेल्या वेळेमध्ये तुम्हाला तुमच्या गाडीत या लसीकरण केंद्रावर जायचे असते. भुजमधील लसीकरण केंद्र हे आर.डी. वारसानी विद्यालयाच्या मैदानावर आहे. याठिकाणी तुम्हाला फक्त तुमचा नंबर येण्याची वाट पहावी लागते. तुमचा नंबर आला, की वैद्यकीय कर्मचारी तुमच्या गाडीजवळ येऊन तुम्हाला लसीचा डोस देतात.

सोशल डिस्टन्सिंगही पाळले जाते..

या पद्धतीमुळे सोशल डिस्टन्सिंगही अधिक काटेकोरपणे पाळले जाते. तरीही, अधिक खबरदारी म्हणून याठिकाणी एका टाईम स्लॉटमध्ये केवळ १०० लोकांचेच लसीकरण केले जात आहे. त्यामुळे प्रशासन याठिकाणी गर्दीवर नियंत्रण ठेवण्यात पूर्णपणे यशस्वी होताना दिसून येत आहे. तसेच, जर लस घेतल्यानंतर कोणाला त्रास जाणवू लागला, तर त्यांना आराम करण्यासाठी याठिकाणी एक तंबूही ठोकण्यात आला आहे.

यापूर्वी ही सुविधा केवळ आरटी-पीसीआर चाचण्यांसाठी उपलब्ध करण्यात आली होती. मात्र, आता अशाच प्रकारे लसीकरणही पार पडत आहे. त्यामुळे लोकांनाही रांगेत उभे राहण्याच्या त्रासापासून सुटका मिळाली आहे. तसेच, यामुळे आपला वेळही वाचत असल्याचे लोकांनी ईटीव्ही भारतशी बोलताना सांगितले.

हेही वाचा :बंगळुरू : बेड मिळत नसल्याने नागरिकांकडून अपार्टमेंटमध्ये मिनी कोविड सेंटर सुरू