EPS as Interim GS: एआयएडीएमकेमध्ये पुन्हा एकदा 'एकल नेतृत्त्व'.. सर्वोच्च न्यायालयाने केले शिक्कामोर्तब, पलानीस्वामीच सरचिटणीस

तामिळनाडूतील प्रमुख विरोधी पक्ष असलेल्या AIADMK पक्षात सरचिटणीस पदावरून चाललेल्या अराजकतेला आळा घालत सर्वोच्च न्यायालयाने गुरुवारी इ पलानीस्वामी यांच्या बाजूने निकाल दिला आहे. पक्षाच्या 11 जुलै रोजी झालेल्या शेवटच्या महापरिषदेच्या बैठकीत माजी मुख्यमंत्री इडापाडी के पलानीस्वामी (ईपीएस) यांच्या अंतरिम सरचिटणीसपदी निवड झाली होती. त्यावर आता सर्वोच्च न्यायालयाने निवडीवर शिक्कामोर्तब केले. त्यांचे प्रतिस्पर्धी ओ पन्नीरसेल्वम (OPS) यांना हा मोठा धक्का आहे.

चेन्नई (तामिळनाडू): तामिळनाडूचे माजी मुख्यमंत्री ईपीएस म्हणजे इ पलानीस्वामी यांनी एआयएडीएमकेमधील वर्चस्वाच्या लढाईत त्यांचे प्रतिस्पर्धी असलेल्या ओपीएस म्हणजे ओ पन्नीरसेल्वम यांना मागे टाकत विजय मिळवला आहे. सुप्रीम कोर्टाने पक्षाचे अंतरिम सरचिटणीस म्हणून EPS यांची झालेली निवड कायम ठेवल्यामुळे, एआयएडीएमके पक्षात आता पुन्हा एकल नेतृत्वाची सुरुवात झाली आहे. पक्षाच्या नेतृत्वासाठी झालेल्या लढाईत ईपीएस यांची पुन्हा निवड झाल्याने त्यांचे प्रतिस्पर्धी ओपीएस यांना मिळालेला हा मोठा धोका आणि त्यांनी खेळलेला एक मोठा राजकीय जुगार होता. आता ईपीएस हे पक्षात पहिल्या क्रमांकाचे नेते झाले आहेत.

ओपीएस यांची हकालपट्टीच:गेल्यावर्षी 11 जुलैच्या शेवटच्या सर्वसाधारण सभेला आव्हान देणारी ओपीएस आणि त्यांच्या आणखी एका समर्थकाने केलेली याचिका फेटाळून लावत सर्वोच्च न्यायालयाच्या खंडपीठाने त्यांची पक्षातून झालेल्या हकालपट्टीवर एकप्रकारे शिक्कामोर्तबच केले. जयललिता यांना अण्णाद्रमुकचे कायमस्वरूपी सरचिटणीसपद रद्द करणारी जनरल कौन्सिल आणि इतर ठरावही न्यायालयाने कायम ठेवले आहेत.

ओपीएस यांना न्यायालयाने फटकारले:EPS यांना पक्षाच्या बहुसंख्य पक्ष कार्यकर्ता आणि आमदारांचा पाठिंबा लाभला असताना, OPS यांनी त्यांच्यासमोर काही लोकांना उभे करून कायदेशीर आव्हान उभे केले होते. सध्याचा निकाल मद्रास उच्च न्यायालयाच्या निकालाला आव्हान देणाऱ्या याचिकांवर देण्यात आला आहे. त्या निकालानुसार पक्षाच्या मंचावर समर्थन सिद्ध न करता राजकीय स्कोअर सेट करण्यासाठी न्यायपालिकेचा वापर केल्याबद्दल ओपीएसला फटकारण्यात आले आहे.

राजकीय भवितव्य संकटात:सर्वोच्च न्यायालयाच्या या निर्णयामुळे OPS यांचे राजकीय भवितव्य संपुष्टात आल्याचे दिसत असताना EPS यांच्या गोटात मात्र जोरदार जल्लोष झाला. कारण, त्यांच्यासाठी प्रलंबीत असलेला हा निकाल महत्त्वाचा होता. या निकालाने सत्ताधारी द्रमुकची बी-टीम म्हणून काम करणाऱ्यांचा मुखवटा उलगडला आहे. सर्वोच्च न्यायालयाच्या निकालाने अण्णाद्रमुकचे 1.5 कोटी कार्यकर्ते आनंदित झाले आहेत. जयललिता मंदिरात केलेल्या माझ्या प्रार्थनेचे उत्तर मिळाले आहे, अशी प्रतिक्रिया ईपीएस यांनी मदुराई येथे बोलताना दिली. हुसचे माजी मंत्री सहकारी आरबी उदयकुमार यांच्या कौटुंबिक विवाहानंतर ते माध्यमांशी बोलत होते.

चेन्नई येथील पक्षाच्या मुख्यालयातील उत्सवात सामील होताना, ईपीएसचे दुसरे प्रमुख डी जयकुमार म्हणाले, 'हा एक दैवी निर्णय आहे, ज्यामुळे पक्षाच्या कार्यकर्त्यांना आनंद झाला आहे. कौरवांचा कट आता उलगडला आहे आणि पांडव जिंकले आहेत'. ओपीएसला एआयएडीएमकेमध्ये पुन्हा प्रवेश देण्याच्या प्रश्नावर ते म्हणाले, ओपीएस, व्हीके शशिकला आणि टीटीव्ही दिनकरन वगळता इतरांना सामावून घेतले जाऊ शकते. ओपीएसच्या राजकीय भविष्याबद्दल त्यांनी फक्त 'शून्य' चे संकेत दिले.