हैदराबादमध्ये शस्त्र तस्करीप्रकरणी पुण्यातील दोन आरोपींना अटक, राचकोंडा पोलिसांची कारवाई

तेलंगाणा येथील राचकोंडा पोलिसांनी आंतरराज्यीय शस्त्र तस्कर टोळीचा पर्दाफाश करत दोन कुख्यात तस्करांना अटक केली आहे. अटक केलेले दोन जण पुणे येथील असल्याची माहिती पोलिसांनी दिली आहे.

हैदराबाद - तेलंगाणा येथील राचकोंडा पोलिसांनी आंतरराज्यीय शस्त्र तस्कर टोळीचा पर्दाफाश करत दोन कुख्यात तस्करांना अटक केली आहे. अटक केलेले दोन जण पुणे येथील असल्याची माहिती पोलिसांनी दिली आहे. नंदकिशोर ( वय २३ वर्षे, गणेश नगर, पिंपरी चिंचवड) आणि रोहन चंदेलिया (२२ वर्ष, डी मार्ट जवळ, पिंपरी-चिंचवड) अशी अटक केलेल्या आरोपींची नावे असून त्यांच्याकडून दोन बंदुका व चार जिंवत कारतुसे जप्त केली आहेत. या दोघांचा साथीदार किरण खवळे फरार आहे.

दोघांकडून मोबाईल फोन व पाचशे रुपयांची रोकड जप्त केली आहे.

अटक केलेले आरोपी

नंदकिशोर व रोहन हे दोघे मित्र असून दोघांना गुन्हेगारी पार्श्वभूमी आहे. अनिकेत जाधव याने सुरू केलेल्या रावण साम्राज्य या टोळीसाठी दोघेजण काम करत होते. नंदकिशोर दहावीपर्यंत शिकलेला आहे तर रोहनने आयटीआयचे शिक्षण घेतले आहे. २०१६ पासून दोघे गुन्हेगारी क्षेत्रात कार्यरत आहेत.

जप्त केलेल्या बंदुका व काडतुसे

२५ मार्च रोजी दोघे बंदुका विक्रीसाठी हैदराबाद येथे रेल्वेने आले होते. २६ मार्च रोजी दोघे रंगारेड्डी जिल्ह्यातील एलबीनगर येथे ग्राहक शोधत होते. त्यांच्या संशयास्पद हालचालीवरून राचकोंडा पोलिसांनी त्यांना पकडले. त्यांच्याकडून दोन बंदुका व चार जिवंत काडतुसे हस्तगत करण्यात आली आहेत. राचकोंडाचे पोलीस आयुक्त महेश भागवत यांच्या मार्गदर्शनाखाली ही कारवाई करण्यात आली.